MANILA — Isang bagong pag-aaral ang nagbabala na ang labis na pagkonsumo ng artificial sweeteners, kabilang ang mga matatagpuan sa diet soda, ay maaaring magdulot ng mas mabilis na pagkasira ng memorya at cognitive decline.

Ayon sa pananaliksik na isinagawa sa Brazil at inilathala sa journal Neurology, natuklasan ng mga eksperto na ang mga kalahok na may pinakamataas na antas ng paggamit ng artificial sweeteners ay nakaranas ng “mas mabilis na pagbaba” ng kakayahan sa pag-iisip at memorya kumpara sa iba.

Sa kanilang pagsusuri, ipinakita na ang regular at mataas na paggamit ng mga sweetener ay maaaring magkaroon ng negatibong epekto sa utak, partikular sa mga parte na may kinalaman sa memorya at konsentrasyon. Bagama’t kailangan pa ng mas malalim na pag-aaral upang matukoy ang eksaktong mekanismo, nagbigay ito ng panibagong babala sa publiko hinggil sa posibleng panganib ng sobrang pag-inom ng diet soda at paggamit ng sugar substitutes.

Pinayuhan ng mga eksperto ang publiko na maghinay-hinay sa pagkonsumo ng artificial sweeteners at iwasan ang sobrang pag-asa sa mga ito bilang kapalit ng asukal. Sa halip, mas mainam na pumili ng masustansyang alternatibo tulad ng prutas at natural na pampatamis.

Ang pag-aaral na ito ay nagdaragdag sa lumalaking ebidensya na ang hindi balanseng pagkain at maling dietary habits ay may direktang epekto hindi lamang sa pisikal na kalusugan kundi maging sa kalusugan ng utak. (Larawan: Google)