Setyembre 10, 2025 – Lumabas ang impormasyon na sina Toni at Alex Gonzaga ay nakatanggap umano ng alok mula sa kampo ni Sarah Discaya upang i-feature sa kani-kanilang mga vlog. Kilala ang magkapatid bilang ilan sa may pinakamaraming followers sa YouTube at iba pang social media platforms, kaya’t malaki ang maitutulong ng kanilang exposure para sa sinumang nais makilala ng mas malawak na publiko.

Ayon sa source, hindi tinanggap ng magkapatid ang nasabing proposal. Ganito rin ang naging tugon ni content creator at socialite Small Laude, na sinasabing inalok ng kampo ni Discaya noong panahon ng kanyang kandidatura bilang mayor ng Pasig. Umabot umano sa P2 milyon ang inialok na talent fee kay Laude, ngunit mariin niya itong tinanggihan.

Sa kasalukuyan, wala pang opisyal na pahayag mula sa panig nina Gonzaga at Laude hinggil sa nasabing usapin. Gayundin, hindi rin malinaw kung anu-ano ang eksaktong kundisyon o nilalaman ng alok ng kampo ni Discaya.

Sa panahon ngayon, karaniwan nang lumalapit ang mga pulitiko sa mga social media influencer at content creator para sa promosyon at kampanya. Dahil malawak ang abot ng mga ito sa online audience, nagiging epektibong plataporma ang kanilang mga channel upang makilala ng publiko ang mga kandidato. Gayunman, hindi lahat ng influencer ay pumapayag na ma-associate ang kanilang pangalan sa mga pulitikong tumatakbo, lalo na kung may kinakaharap na isyu o kontrobersiya.

Samantala, nananatiling palaisipan kung sinu-sino ang iba pang personalidad na nakatanggap o tumanggap ng alok mula sa kampo ni Discaya noong nakaraang halalan.

Source Salve de Asis