Oktubre 28, 2025 – Nagdadalamhati ang mundo ng OPM matapos pumanaw ang vocalist ng sikat na 2000s band na Jeremiah, si Piwee Polintan. Kinumpirma ng kanyang mga kasamahan sa banda ang malungkot na balita sa opisyal na Facebook page ng Jeremiah Band ngayong Martes, Oktubre 28, 2025.

“It is with profound sadness that we announce the passing of Mr. Piwee Polintan, beloved vocalist of the band Jeremiah,” ani ng pahayag. “Piwee was an exceptional artist whose voice and passion touched the hearts of many. Beyond his music, he was a cherished friend, a loving soul, and a brother to us all.”

Ayon sa grupo, pumanaw si Piwee ilang araw matapos siyang atakihin sa stroke noong Oktubre 23. Bago siya binawian ng buhay, nanawagan pa ang banda ng dasal at suporta para sa kanyang paggaling.

Isa si Piwee sa mga orihinal na miyembro ng Jeremiah, na sumikat noong 1998 sa pamamagitan ng kanilang hit song na “Nanghihinayang.” Ang kanyang boses ay naging bahagi ng mga paboritong hugot anthem ng dekada 2000.

Matatandaan na noong 2014, sa panayam niya sa Kapuso Mo, Jessica Soho, ibinahagi ni Piwee na nagkaroon siya ng stage 4 tonsil cancer noong 2007. Sa kabila nito, matagumpay siyang gumaling matapos sumailalim sa operasyon at chemotherapy, at idineklarang cancer-free noong 2011 — dahilan upang makabalik siya sa entablado at muling makapagbigay-inspirasyon sa pamamagitan ng musika.

Maraming netizens at kapwa musikero ang nagpaabot ng pakikiramay sa pamilya at banda ni Piwee. Marami ang nagpahayag ng kanilang kalungkutan sa pagpanaw ng isa sa mga tinig na nagmarka sa kasaysayan ng OPM love songs.

“Isa kang alamat, Piwee. Salamat sa mga kantang nagpaiyak at nagpangiti sa amin,” ayon sa komento ng isang fan sa social media.

Hanggang sa huling sandali, mananatiling buhay sa puso ng mga tagahanga ang boses at alaala ni Piwee Polintan — ang orihinal na tinig sa likod ng “Nanghihinayang.”

Rest in peace, Piwee. Your music will live on forever.