Oktubre 29, 2025 – Matapos pumanaw ang kilalang choreographer na si Anna Feliciano noong Oktubre 24, 2025, hindi napigilan ng kanyang dating asawa na si Mel Feliciano ang maging emosyonal sa kanyang mensahe ng pamamaalam.

Sa Facebook post ni Mel, nagpasalamat siya kay Anna para sa mga alaala at sa pag-aalaga nito sa kanilang anak na si Rupert Feliciano. Ayon sa kanya, kahit naghiwalay sila bilang mag-asawa, mananatili pa rin ang respeto at pasasalamat niya sa dating kabiyak.

 “Paalam, Anna. Gusto kong malaman mo na salamat — dahil kahit nagkahiwalay tayo, marami akong natutunan bilang ama. Salamat sa pag-alaga kay Rupert. Tama man o mali ang paghihiwalay natin, patawad,” sulat ni Mel sa kanyang post.

Dagdag pa niya, ayaw niyang gumawa agad ng post habang ginaganap ang burol dahil gusto niyang ibigay kay Anna ang “moment” na iyon.

Mga kaibigan sa industriya, nagbigay-pugay. Bukod kay Mel, ilan sa mga kilalang choreographers sa bansa tulad nina Lyn Tamayo at Joy Cancio ay nagbigay rin ng kanilang huling pagpupugay sa yumaong dancer.

Ibinahagi ni Lyn sa social media kung paano siya halos nagdalawang-isip pumunta sa burol dahil sa lakas ng ulan, pero tila “divine intervention” daw ang nagtulak sa kanya na dumalo.

 “Pagpasok ko pa lang sa loob, ramdam ko agad ang katahimikan at pagmamahal na bumabalot kay Anna. Nakangiti siyang nakahimlay—parang tanda ng kanyang kapayapaan,” ani Lyn.

“Ang daming alaala ang bumalik — mga rehearsals, tawa, at samahang binuo ng sayaw. Mananatili sa amin ang kabaitan at init ng puso ni Anna.”

Samantala, nagpasalamat din si Joy Cancio, mentor ng SexBomb Dancers, sa naging impluwensya ni Anna sa kanya:

 “My dear mentor, Ms. Anna Feliciano, may you rest in God’s kingdom. Thank you for the lessons and inspiration. Deepest condolences to the family,” ani Joy sa kanyang tribute post.

Mga dancers at artista, dumalo sa burol

Dumalo rin sa huling gabi ng lamay sina Vhong Navarro at Jhong Hilario, na kapwa miyembro ng Streetboys at mga host ng It’s Showtime.

Bilang pagpupugay, naghandog ng espesyal na sayaw ang mga dating kasamahan ni Anna sa industriya — isang emosyonal na sandali na nagpapaalala kung gaano siya kamahal ng kapwa dancers.

Si Anna Feliciano ay 65 taong gulang nang pumanaw dahil sa atake sa puso. Kilala siya bilang isa sa mga haligi ng local dance scene at dating miyembro ng Solid Gold Dancers, kung saan din nagtagpo ang landas nila ni Mel.

Larawan mula sa Pep.ph