Nobyembre 11, 2025 – Mainit na naman ang pangalan ni Anjo Yllana matapos siyang maglabas ng matinding sama ng loob laban sa ilang dati niyang kasamahan sa Eat Bulaga!—lalo na kina Jose Manalo, Joey de Leon, at Vic Sotto.

Sa isang emosyonal na rant sa social media, diretsahang tinawag ni Anjo na “ahas” si Jose Manalo matapos umano itong maging dahilan ng pagkakaalis ng kanyang pangalan sa isang kanta na ginamit sa noontime show. Hindi rin niya pinalampas sina Joey at Vic, na ayon sa kanya ay tila wala man lang ginawang hakbang para itama ang sitwasyon.

“Hindi ko deserve ang ganitong treatment, lalo na galing sa mga dating kasamahan ko,” ayon umano sa pahayag ni Anjo sa kanyang post na agad kumalat online.

Habang bumuhos ang suporta ng ilan sa kanya, marami rin ang pumuna kay Anjo sa pagiging “overacting” at sa tila walang tigil niyang rant. May mga nagkomento pa nga na dapat daw ay “move on” na siya at humingi na lang ng trabaho pabalik sa Eat Bulaga! kung talagang gusto pa niyang bumalik sa industriya.

“Anjo dear, rant ka ng rant, yan tuloy lumapad ilong mo. Sabihin mo na lang kina Bossing na kailangan mo ng trabaho baka maawa pa sila,” sabi ng isang netizen.

May ilan namang nagtatanggol kay Jose Manalo at nagsabing wala itong kinalaman sa isyu dahil abala umano siya sa birthday celebration ng kanyang anak at asawa noong araw ng insidente. “Bakit kay Jose siya galit, eh wala naman siya sa show nung araw na ‘yon?” tanong ng isang commenter.

Kasabay ng mainit na palitan, muling nabuhay ang mga lumang isyu tungkol sa personal na buhay ni Anjo, kabilang na ang mga kwento noon na may kinalaman sa umano’y “third party” at dating asawa niyang si Jacqui. May ilang netizen pa nga ang nagsabing tila hindi natuto ang komedyante sa mga nakaraang kontrobersiya.

Ayon sa ilan, tila lumalabas na ginagamit lang daw ni Anjo ang social media para maglabas ng sama ng loob at muling mapansin ng publiko matapos ang matagal na pananahimik sa showbiz.

Sa kabila ng pag-eskandalo online, tahimik pa rin ang panig ng Eat Bulaga! management at maging sina Vic Sotto at Joey de Leon. Wala pang opisyal na pahayag tungkol sa umano’y pagtanggal ng pangalan ni Anjo sa kanta, pati na rin sa mga akusasyon ng komedyante laban kay Jose Manalo.

Samantala, patuloy pa ring pinag-uusapan ng mga netizens ang isyu, na tila muling nagbukas ng matagal nang sugat sa pagitan ng dating magkakaibigan at magkatrabahong komedyante.

Kung tutuusin, matagal ding naging bahagi ng Eat Bulaga! si Anjo Yllana, at isa siya sa mga nakasama sa mga pinakamemorable na segment ng programa noon. Kaya naman para sa ilang fans, nakakalungkot daw na nauwi sa ganitong bangayan ang samahan ng mga dating magkakaibigan sa entablado.

Habang patuloy na umiikot ang chika at speculation online, nananatiling palaisipan pa rin kung ano ang tunay na dahilan ng pag-aalis ng pangalan ni Anjo—at kung may posibilidad pa bang maayos ang gusot sa pagitan ng mga beteranong komedyante ng Eat Bulaga!