Nobyembre 13, 2025 – Muling humarap sa kamera ang kilalang TV host na si Kuya Kim Atienza matapos ang ilang linggong pananahimik at pagdadalamhati sa pagpanaw ng kanyang bunsong anak na si Emman Atienza.

Sa kanyang pagbabalik sa “TiktoClock” ng GMA, emosyonal na ibinahagi ni Kuya Kim ang kanyang saloobin sa unang araw niya ulit sa trabaho. “Hindi po madali ang bumalik po sa trabaho,” ani niya, habang ramdam ng mga manonood ang bigat ng pinagdadaanan ng host.

Dagdag pa niya, bagama’t hindi pa tuluyang “back to normal” ang lahat, pinili niyang magpatuloy dahil alam niyang gusto ni Emman na magbigay pa rin siya ng saya sa mga tao. “Gusto po ni Emman na ako po ay bumalik dito at magpasaya,” pahayag ni Kuya Kim.

Nagpasalamat din siya sa mga nakiramay at patuloy na sumusuporta sa kanilang pamilya sa panahong ito ng pagdadalamhati. “Life will never be the same, but it goes on,” aniya sa caption ng kanyang Instagram post.

Bukod sa “TiktoClock,” balik na rin si Kuya Kim sa kanyang segment sa “24 Oras.” Dito, pinuri siya ng netizens sa kanyang tapang at pagiging inspirasyon sa kabila ng matinding lungkot na kanyang dinaranas.

Si Emman Atienza, na pumanaw noong October 22 sa Los Angeles, California, ay nakilala online sa paggawa ng mga content tungkol sa mental health awareness, lifestyle, at social issues. Maraming netizens ang nagpatunay kung gaano siya naging inspirasyon at kabutihan sa online community.

Ayon sa mga ulat, nakikibaka si Emman sa depression at bipolar disorder, ngunit sa kabila nito, nanatili siyang positibo at mapagmahal sa kanyang pamilya at mga kaibigan.

Sa ngayon, patuloy pa ring binubuhos ng mga tagasuporta ni Kuya Kim at Emman ang kanilang dasal at pakikiramay sa pamilya Atienza. Marami ring netizens ang humanga sa tapang ni Kuya Kim na bumalik sa telebisyon kahit mabigat pa ang pinagdadaanan bilang isang ama.

 “A little kindness every day. If I can be a little kinder today, then Emman will be alive in our hearts,” emosyonal na mensahe ni Kuya Kim — isang paalala na sa kabila ng sakit, patuloy ang buhay, at patuloy ang pag-ibig ng isang ama para sa anak.

Larawan: Gma Network