Nobyembre 20, 2025 – Iniinit ngayon sa social media ang umano’y “rivalry” sa pagitan nina Andres Muhlach at Rabin Angeles, dalawang pinaka-mainit na matinee idols ng Viva Artists Agency. Pero habang nagpapasabugan ng tirada ang ilang fans online, ang dalawa namang aktor—kalma, chill, at very much friends pa rin.

Nag-ugat ang isyu sa matinding fan wars ng kani-kanilang loveteams na sumikat mula sa hit Viva One series na “Ang Mutya ng Section E.” Dahil parehong nagbunga ng bigating projects ang kanilang tandems, hindi maiwasang i-compare at ipagbangga ang dalawang rising actors.

Sa panig ni Andres, todo lipad ang tandem nila ni Ashtine Olviga, na agad binigyan ng launching movie na “Minamahal: 100 Bulaklak Para Kay Luna.” Samantala, panalong-panalo rin sa audience si Rabin kasama si Angela Muji matapos magpakilig sa “Seducing Drake Palma.” Level up pa nga dahil siya ang bibida sa Pinoy adaptation ng ‘A Werewolf Boy.’

Kaya nang magharap muli ang buong cast sa mediacon ng “Ang Mutya ng Section E: The Dark Side,” natural na naitanong ang tsismis na may tensyon daw kina Andres at Rabin. Pero mabilis nila itong pinatay, sabay sabing walang katotohanan ang mga parinig ng fans.

Ayon kay Rabin, hindi raw naapektuhan ang friendship nila ng mga online bashings. Inamin din niyang minsan nalulungkot siya sa comments, pero lagi siyang inaalalayan ni Andres bilang “kuya.”

“Tinuturuan niya ako na ‘wag magbasa ng comments. Sabi niya, ‘Game ulit tayo, shoot ulit tayo.’ Kaya okay kami,” kuwento ni Rabin.

Si Andres naman, very firm na walang anumang kompetisyon sa pagitan nila. Para sa kanya, ang tunay na magic ng “Mutya” ay ang samahan ng buong cast.

“At the end of the day, friends kami. Yung ‘rivalry’ na ‘yan, sa fans lang talaga,” sabi ng aktor.

Magsisimula na ang first part ng Season 2 ng “Ang Mutya ng Section E: The Dark Side” sa December 4, habang ang second part ay mapapanood sa June 11. Asahan ang bagong revelations, mas intense na twists, at mas makulay na gulo sa buhay nina Keifer, Jay-Jay, at Yuri.

Kahit ano pang paingay ng fans, malinaw ang mensahe ng dalawang aktor: hindi sila magkaaway—mas nagiging close pa sila habang humahaba ang journey nila sa showbiz.

Larawan mula sa Viva