Nobyembre 25, 2025 – Matapos ang halos isang buwang pamamalagi sa Bangkok para sa international K-pop thriller na Perfect Girl, kinailangang bitawan ni AC Bonifacio ang proyekto dahil sa isang hindi inaasahang aksidente—isang motorcycle taxi slip na humantong sa operasyon sa kanyang kanang braso.

Ayon kay AC, hindi man ito work-related incident, nangyari ang aksidente sa isang simpleng off-day na plano lang sana niyang mamasyal sa weekend market. Ayon sa aktres, “It was a motorcycle accident, we slipped. Nothing crazy, pero nadulas kami. I blocked my fall with my arm. If not, baka mas grabe.”

Mabilis siyang nakahinga nang maluwag pagkatapos ng fall dahil gumagalaw pa raw ang kamay niya. Pero nang subukan niyang tumayo at hindi na niya maigalaw nang maayos ang braso dahil sa matinding sakit, doon niya narealize na may seryoso nang nangyari. Sa kabila ng walang sugat o gasgas, internal injury pala ang malaking problema.

Kinumpirma ng medical team na may humerus fracture siya—isang injury na kinakailangang operahan agad. Dahil hindi biro ang timeline ng recovery, umabot sa anim na linggo ang inaasahang pagpapagaling ni AC.

Pinuri naman ni AC ang Thai production at buong movie staff dahil sa mabilis na pag-asikaso sa kanya, kahit wala ito sa mismong set. “They took care of me, from medical attention hanggang communication sa team. Everyone was concerned about my health,” ani AC.

Ngunit dahil sa haba ng recovery period, nagkaroon ng mahaba at malalim na discussions ang production team at kampo ni AC. Sa huli, napagdesisyunan na hindi na kaya ng schedule na ipagpatuloy niya ang pag-shoot. “We tried every way to make it work. Pero hindi talaga magiging feasible with my arm. We decided it’s better to prioritize healing,” aniya.

Aminado ang aktres na nasaktan siya sa pagkawala sa proyekto dahil pinaghirapan niya ang audition para makuha ang role. “Dream role mo ‘yon tapos mawawala dahil sa aksidente—syempre masakit,” aniya. Pero tanggap niya ang desisyon at nagpapasalamat pa rin sa team na naging maunawain sa sitwasyon.

Habang nagpapagaling, nagsisilbing inspirasyon si AC sa fans na kahit madapa—literal man o hindi—mahalaga pa ring unahin ang kalusugan at bumangon ulit kapag kaya na.