Aabot sa 9.5 milyong bagong Pilipino na edad 10 pataas ang naitalang nagsimulang manigarilyo mula 2021 hanggang 2023, ayon sa pinakabagong datos. Ang nakakabahalang bilang na ito ay nagpapakita ng patuloy na hamon sa pagtugon sa problema ng paninigarilyo sa bansa, lalo na sa mga kabataan.

Nagpahayag ng pag-aalala ang mga eksperto sa kalusugan at mga organisasyong kontra-paninigarilyo dahil sa pagtaas ng bilang ng mga kabataang naninigarilyo, na itinuturing na pangunahing target ng tobacco industry. Binigyang-diin nila ang pangangailangan ng mas mahigpit na pagpapatupad ng mga batas kontra paninigarilyo, mas malawak na kampanya sa edukasyon, at suporta para sa mga nais tumigil sa bisyo.

Ayon kay Senador Sherwin Gatchalian, sa 9.5 milyong bagong naninigarilyo na naitala mula 2021 hanggang 2023, halos isang milyon ang kabataan, base sa pag-aaral ng kanyang opisina gamit ang iba't ibang datos mula sa pamahalaan, kabilang ang Department of Science and Technology-Food and Nutrition Research Institute (DOST-FNRI).

Dagdag pa rito, tinatayang 1.1 milyon sa mga bagong naninigarilyo ang gumamit ng iligal na sigarilyo. Ang datos na ito ay nagdudulot ng mas malalim na pangamba tungkol sa epekto ng iligal na kalakalan ng sigarilyo at ang dumaraming bilang ng kabataang naaakit sa paninigarilyo. Nanawagan ang mga mambabatas at health advocates ng mas mahigpit na aksyon upang labanan ang problemang ito.

“I was wondering why despite implementing excise tax on e-cigarettes as well as heated tobacco products, the number of new smokers increased particularly among the youth. That is why one of our recommendations is to increase the taxes on heated tobacco products as well as e-cigarettes, and also plug their leakage, make [all vapor products] unitary in terms of tax application,” ani Gatchalian.

Ayon sa mga mananaliksik mula sa University College London (UCL), ang bawat sigarilyo ay nagbabawas ng halos 20 minuto ng buhay mula sa isang naninigarilyo. Sa karaniwan, ang isang regular na pakete ng 20 sigarilyo ay maaaring magpaikli ng buhay ng isang tao nang halos pitong oras.

Batay sa pag-aaral, kung ang isang tao na naninigarilyo ng 10 sigarilyo bawat araw ay titigil sa paninigarilyo sa Enero 1, maiiwasan nila ang pagkawala ng isang buong araw ng kanilang buhay pagsapit ng Enero 8. Bukod dito, kung ititigil ang paninigarilyo sa unang araw ng taon, maaaring mabawi ang isang linggo ng buhay pagsapit ng Pebrero 20, at sa pagtatapos ng taon, maiiwasan ang pagkawala ng 50 araw ng buhay.

Lawaran mula sa Al Arabiya.