Isang bagong dalawang-palapag na gusali na magsisilbing Coast Guard Sub-Station (CGSS) ang opisyal na binuksan sa isang simpleng blessing at ribbon cutting nitong Huwebes sa Brgy. 30 Bid-bid, Caridad, sa siyudad ng Cavite.

Dumalo bilang mga panauhing pandangal at tagapagsalita sa inaugurasyon sina Cavite City Mayor Denver Chua, Vice Mayor Raleigh Rusit, at Commodore Christopher Meniado.

Sa kanyang talumpati, ipinaabot ni Commodore Christopher Meniado ang taos-pusong pasasalamat sa pamahalaan ng Cavite City sa kanilang kabutihang loob sa pagbibigay ng bagong pasilidad para sa Coast Guard Sub-Station (CGSS).

Binanggit din ni Meniado ang mahalagang papel ng Philippine Coast Guard (PCG) sa pagpapalakas ng kaligtasan sa dagat, pagpapatupad ng batas pandagat, pagtugon sa mga kalamidad, at pangangalaga sa mga yamang dagat.

Ayon pa kay Meniado, ang seremonya ay hindi lamang nagdiwang ng pagtatapos ng bagong gusali ng Coast Guard, kundi nagbigay diin din sa kahalagahan ng pagtutulungan at sama-samang pagsusumikap ng iba't ibang ahensya ng gobyerno.

"This partnership played a vital role in turning the vision for the sub-station into reality. Such collaborations are essential for effectively addressing the complex maritime challenges facing the coastal waters of Cavite City, ensuring coordinated and efficient responses to a wide range of maritime issues," saad ni Meniado.

Sinabi ni Mayor Denver Chua na ang bagong gusali ay magsisilbing permanenteng tahanan ng mga tagapagtanggol ng dagat sa siyudad ng Cavite.

"The coast guard helps our citizens a lot, especially our sailors. They are also our constant partners in various programs of our city government," wika ng mayor.

"Therefore, it is appropriate that they have a proper, decent and permanent home in our area. May this strengthen the good friendship between the City of Cavite and the Philippine Coast Guard," dagdag ni Chua.

(Larawan mula sa Peoples Talia)