Naiuwi na sa bansa ang mga labi ng Pilipinang si Marvil Facturan-Kocjančič na pinatay ng kanyang Slovenian na asawa na si Mitja Kocjančič noong Disyembre 29, 2024.

Noong Enero 13, lumapit si Nanay Vilma Pila sa Raffy Tulfo in Action (RTIA) upang humingi ng tulong na makamit ang hustisya para sa kanyang anak at maiuwi ang mga labi nito sa Pilipinas.

Kaagad namang sinamahan ng RTIA team si Nanay Vilma sa tanggapan ni dating Department of Foreign Affairs (DFA) Usec. Eduardo de Vega upang ayusin ang mga papeles para sa pagpapauwi ng mga labi ni Marvil sa kanilang probinsya sa Negros. Tumanggap din sila ng ₱25,000 financial assistance mula sa ahensya.

Noong Enero 28, dumating na sa Mactan Cebu International Airport ang mga labi ni Marvil, kung saan sinalubong ni Nanay Vilma at ng RTIA team ang katawan ng pumanaw na anak.

Tulad ng ipinangako ni Senador Raffy Tulfo, personal niyang sinagot ang lahat ng gastusin mula sa paghatid ng mga labi ni Marvil sa Negros hanggang sa burol at libing nito. Nangako rin siyang magpapaabot ng karagdagang tulong sa iba pang pangangailangan ng pamilya.

Labis ang pasasalamat ni Nanay Vilma at ng kanilang pamilya kay Senador Tulfo dahil sa mabilis na pagpapauwi sa mga labi ni Marvil at sa lahat ng tulong pinansyal na naipagkaloob nito.

"Lubos ang aming pasasalamat kay Senador Tulfo at sa RTIA team sa kanilang tulong at suporta. Hindi namin akalain na mapapauwi agad ang mga labi ng anak ko," ani Nanay Vilma.

Samantala, tiniyak ni Philippine Ambassador to Austria Luli Arroyo-Bernas na tututukan ng embahada ang kaso ni Marvil at maigting silang makikipag-ugnayan sa mga awtoridad sa Slovenia upang mapabilis ang pagresolba nito.

"Ang embahada ay magtutulungan sa mga awtoridad sa Slovenia upang masiguro na makakamit ang hustisya para kay Marvil," pahayag ni Arroyo-Bernas.

Nangako rin si Senador Tulfo na patuloy niyang imomonitor ang kaso ni Marvil hanggang sa mapanagot at mapagbayaran ni Mitja Kocjančič ang krimen na ginawa nito. "Hindi kami titigil hangga't hindi nakakamit ang hustisya para kay Marvil. Patuloy nating tututukan ang kasong ito," ani Tulfo.

Ang pagkamatay ni Marvil ay nagdulot ng labis na kalungkutan sa kanyang pamilya at mga kaibigan. Ang kanilang hangarin ay makamit ang hustisya at mapanagot ang may sala sa krimen.

(Larawan: Raffy Tulfo in Action)