Pinapurihan ng Second Congressional Commission on Education (Edcom 2) ang pagpapatupad ng Republic Act (RA) No. 12124, isang makasaysayang batas na nagpapahintulot sa mga Pilipino na makakuha ng college credits batay sa kanilang propesyonal na karanasan at kasanayan.

Kilala bilang Expanded Tertiary Education Equivalency and Accreditation Program (ETEEAP), binibigyan nito ng kapangyarihan ang Commission on Higher Education (CHEd) na magbigay ng equivalency credits sa mga kuwalipikadong Pilipino, anuman ang kanilang lokasyon o estado ng trabaho.

"Naiintindihan namin kung gaano kahalaga ang isang diploma sa kolehiyo para sa ating mga kababayan," ani Senator Joel Villanueva, co-chairperson ng Edcom 2 at may-akda ng batas sa Senado. Binigyang-diin niya na sa pamamagitan ng programang ito, maaaring gamitin ng mga indibidwal ang kanilang karanasan sa trabaho, mga natamong tagumpay, at kasanayan upang makamit ang isang bachelor’s degree nang hindi kinakailangang dumaan sa tradisyunal na sistema ng edukasyon.

Ang Edcom 2 ay isang bicameral na komisyong pangkongreso na nagsusuri at nagmumungkahi ng mga reporma sa sistema ng edukasyon sa bansa.

Ipinahayag ni Villanueva na ang RA 12124 ay nagbibigay ng "alternative pathways" para sa mga Pilipino upang makamit ang kanilang mga layuning pang-edukasyon. Samantala, binigyang-diin ni Baguio City Representative Mark Go, isa ring co-chairperson ng Edcom 2, na tinutugunan ng batas ang "matagal nang hindi pantay na oportunidad sa edukasyon" sa pamamagitan ng pagbibigay ng pagkakataon sa mga propesyonal na manggagawa na makakuha ng kanilang degree.

"Kinilala ng batas na ito ang halaga ng iba't ibang paraan ng pagkatuto at binibigyan nito ng kapangyarihan ang mga Pilipino na maabot ang kanilang buong potensyal upang mapaunlad ang kanilang buhay at pamilya," ani Go.

Kwalipikasyon at Pagsusuri

Upang maging kuwalipikado sa programa, kailangang may hindi bababa sa limang taon ng kaugnay na karanasan sa trabaho ang mga aplikante at pumasa sa isang komprehensibong pagsusuri ng kanilang kakayahan upang makuha ang equivalency credits.

"Ang makabagong paraang ito ay pinupunan ang agwat sa pagitan ng propesyonal na karanasan at akademikong tagumpay, na nagpapahintulot sa mga aplikante na matapos ang kanilang degree nang mas mabilis kumpara sa tradisyunal na edukasyon," ayon sa Edcom 2.

Ang mga higher education institutions na lalahok sa programa ay dadaan sa akreditasyon ng CHEd, na magsasagawa ng masusing pagsusuri sa kanilang kakayahan upang ipatupad ang ETEEAP. Binigyang-diin ng komisyon na ang CHEd ay magsasagawa ng "mahigpit na ebalwasyon" upang matiyak na ang mga aplikante ay makakatugon sa akademikong pamantayan na kinakailangan para sa degree equivalency.

Papel ng CHEd

Nilagdaan ni Pangulong Ferdinand Marcos Jr. ang RA 12124 noong Lunes, bagama't iniulat lamang ng Presidential Communications Office (PCO) ang pagpapatibay nito noong Miyerkules.

Ayon sa PCO, may mahalagang papel ang CHEd sa pagpapatupad ng ETEEAP, dahil ito ang magbibigay ng pahintulot sa mga kolehiyo at unibersidad na mag-alok ng degree sa ilalim ng programa. Magtatakda rin ito ng mga pamantayan para sa pagsusuri ng kasanayan, kaalaman, at karanasan ng mga indibidwal.

Alinsunod sa batas, susuriin ng ETEEAP ang nakaraang pagkatuto at karanasan sa trabaho ng isang indibidwal—maging ito man ay mula sa paaralan, pagsasanay, o tunay na karanasan sa trabaho—upang matukoy kung kuwalipikado silang makatanggap ng college degree credits o makapasok sa mga espesyal na graduate program.

Ang mga kuwalipikadong aplikante ay dapat na mga Pilipinong mamamayan, naninirahan man sa Pilipinas o sa ibang bansa. Dapat silang hindi bababa sa 23 taong gulang at nakapagtapos ng sekondaryang edukasyon bago mag-apply para sa equivalency at accreditation.

Larawan mula sa inquirer.net.com.