MANILA, Marso 21, 2025 – Pinabulaanan ng North Luzon Expressway (NLEX) Corporation ang mga alegasyon na nabawasan ang vertical clearance ng Marilao Interchange Bridge dahil sa pag-aaspalto ng kalsada.

Nilinaw ng NLEX Corporation ang isyu matapos bumangga ang isang 18-wheeler truck sa istruktura ng tulay noong Marso 19, na nagdulot ng matinding pinsala.

Sa isang pahayag, iginiit ng NLEX Corporation na nananatili sa itinakdang pamantayan ng kaligtasan ang vertical clearance ng tulay.

"Name-maintain naman po namin na nasa 4.5 po yon e kaya 'di pwedeng patong lang ng patong ng espalto 'pag nagrerepair, ang ginagawa po diyan kinakayod po yung sirang pavement para naman po yung paglatag ganun parin po yung kapal," paliwanag ni Robin Ignacio, Senior Manager for Traffic Operations ng NLEX.

Ang insidente ay kinasangkutan ng isang trak na may kargang mga oxygen tank, na muling nagbigay-diin sa kahalagahan ng pagsunod sa height restrictions.

Ayon sa Marilao police, lumampas ang taas ng trak sa itinakdang limitasyon ng clearance na 4.27 metro, dahilan ng pagbangga nito sa tulay.

"May vertical clearance yun na 4.27 nakalagay naman po dun yung restriction na 4.27 meters lang yung allowed na pumasok pero yung truck over sa 4.27 so lumagpas siya sa limit," ayon kay Police Lieutenant Colonel Eulogio Lanqui III ng Marilao PNP.

Binigyang-diin ni Ignacio ang agarang pangangailangan ng pagkukumpuni.

“Ang gawaan po ay ineexpect po na between two to three weeks po. Kailangan po talagang madaliin ito. Bago mag Holy Week ay maayos na nadadaanan lahat ng lanes natin,” aniya sa isang panayam.

Upang mabawasan ang epekto sa daloy ng trapiko, pansamantalang isinara ang dalawang northbound lanes at nagbukas ng zipper lane sa direksyong southbound. Pinayuhan ang mga motorista na asahan ang mabigat na daloy ng trapiko, lalo na sa oras ng rush hour.

“Sa ngayon, biglang humaba na po yung traffic natin dahil rush hour na po. Ang ating tail end nandito sa Valenzuela area, so around within seven to eight kilometers slow-moving traffic po natin,” dagdag ni Ignacio.

Nakipag-ugnayan na rin ang NLEX Corporation sa Department of Public Works and Highways (DPWH) at mga lokal na pamahalaan upang tugunan ang sitwasyon. Gayunpaman, nananatili ang hindi malinaw na usapin kung sino ang may hurisdiksyon sa tulay, na nagiging balakid sa pangmatagalang solusyon.

“Years back po yung coordination na po namin with DPWH pero yun nga po ang tinuturo po ay ang [LGU],” paliwanag ni Ignacio.

Image from Balitang Bulacan