ABRIL 8, 2025 — Ayon sa bagong labas na footage, agresibong sinubukan ng barko ng China Coast Guard (CCG) na banggain ang isang barko ng Philippine Coast Guard (PCG) sa West Philippine Sea. Pangalawang engkwentro na ito sa loob lamang ng dalawang araw.

Nangyari ang insidente noong Lunes, humigit-kumulang 98 nautical miles mula sa Palauig Point, Zambales. Doon, paulit-ulit na gumawa ng “dangerous maneuvers” (mapanganib na maniobra) ang CCG-3302 laban sa mas maliit na BRP Cabra. Inulat ng PCG na ilang beses sinikap ng barko ng China na tamaan ang stern ng Cabra, kaya’t mabilisang umiwas ang mga tauhan ng Pilipinas para maiwasan ang banggaan.

Nang hindi ito nagtagumpay, naglunsad ang CCG ng mas mabilis na bangka, ang CCG-21612, para subukang banggain muli ang Cabra — pero nabigo rin. Sa kabila ng pagiging agresibo ng China, nanatiling propesyonal ang mga tauhan ng PCG at naipagtanggol ang barko sa pamamagitan ng mahusay na pagmamaneho.

Kasunod ito ng katulad na insidente noong Linggo, kung saan sinundan at hinarang ng parehong barko ng China ang BRP Cabra malapit sa Zambales. Binigyang-diin ng PCG ang "unwavering resolve" (matatag na determinasyon) nito sa pagprotekta sa teritoryo ng Pilipinas, patuloy na nagmamatyag, at lumalaban sa presensya ng CCG.

Walang iniulat na nasaktan o nasirang gamit, pero lalong tumitindi ang tensiyon sa mga pinag-aagawang karagatan dahil sa mga insidenteng ito.

(Larawan: Philippine News Agency)