Abril 23, 2025 — Dadalo si Pangulong Ferdinand “Bongbong” Marcos Jr. sa libing ni Pope Francis sa Vatican City bilang kinatawan ng Pilipinas matapos pumanaw ang Santo Papa kamakailan. Ayon sa Pangulo, si Pope Francis ang “the best Pope in my lifetime.”

Kinumpirma ng Office of the President na sasamahan si Marcos ng Unang Ginang Liza Araneta-Marcos sa seremonyang gaganapin sa St. Peter’s Basilica, kung saan inaasahang dadalo ang mga pinuno ng iba’t ibang bansa.

Sa pahayag ng Palasyo, binigyang-diin ni Marcos ang malaking ambag ni Pope Francis sa kapayapaan at pagkakaisa sa buong mundo.

“Pope Francis was a beacon of hope and compassion, and his legacy will continue to inspire generations,” ayon sa Pangulo.

Makakasama ng delegasyon ng Pilipinas ang mga bansa sa pagbigay-pugay sa Santo Papa na kilala sa kanyang makabago at makataong pananaw, partikular sa mga isyu ng katarungang panlipunan at awa sa mga mahihirap.

Ibinahagi rin ng Pangulo ang kanyang personal na karanasan kay Pope Francis, nang magtagpo sila noong pagbisita ng Santo Papa sa Pilipinas noong 2015. “His kindness and humility left an indelible mark on me,” aniya.

Ang pakikidalamhati ni Marcos ay nagpapakita ng malalim na ugnayan ng Pilipinas sa Vatican, gayundin ng pananampalatayang Katoliko ng nakararaming mamamayan. Tinatayang higit 80% ng mga Pilipino ay Katoliko, dahilan kung bakit naging malawak ang pagluluksa sa bansa sa pagpanaw ng Santo Papa.

Nanawagan si Marcos sa publiko na isabuhay ang mga prinsipyo ni Pope Francis. “Let us continue to uphold the principles he stood for and strive to make the world a better place,” sabi ng Pangulo.