ABRIL 28, 2025 — Ginising ng malakas na pagsabog ang mga residente malapit sa Bulusan Volcano sa Sorsogon madaling-araw ng Lunes. Nagbuga ito ng abo sa mga kalapit na barangay at nagtulak sa mga awtoridad na itaas ang alert level.

Ayon sa Philippine Institute of Volcanology and Seismology (Phivolcs), nagsimula ang phreatic eruption nang 4:36 ng umaga at tumagal ng halos kalahating oras. Umabot sa 4.5 kilometro ang taas ng abo, na tinangay ng hangin patimog-kanluran at dumapo sa ilang barangay sa Irosin at Juban. Mabilis na bumaba ang pyroclastic flows — mapanganib na pagdaloy ng mainit na gas at bato — sa mga dalisdis, pero huminto sa loob ng 3 kilometro mula sa tuktok.

“Ang nangyayari dito, it ejects steam, ash and rock fragments. Wala pong involved dito na panibagong magma,” paliwanag ni Phivolcs Director Teresito Bacolcol sa isang interbyu. “Yung steam-driven eruption kanina may be succeeded by the same similar events in the following days or following weeks.” 

(Ang nangyayari rito, naglalabas ito ng singaw, abo, at maliliit na bato. Walang bagong magma na kasangkot dito. Ang steam-driven eruption kanina ay maaaring sundan ng mga katulad na pagsabog sa mga susunod na araw o linggo.)

Iniulat ng mga lokal na opisyal na may narinig na ugong bago sumabog ang bulkan, na kinumpirma naman ng mga seismic sensor. Nakapagtala din ang Phivolcs ng 53 volcanic earthquakes isang araw bago mag-erupt, senyales ng tumitinding aktibidad.

Mahigpit na ipinagbawal ng mga awtoridad ang pagpasok sa 4-kilometrong permanent danger zone, at nagbabala sa mga panganib tulad ng pagguho ng bato, landslides, at posibleng mas malalakas na pagsabog. Pinayuhang magtakip ng ilong ang mga komunidad gamit ang mask o basang tela para maiwasan ang paglanghap ng abo.

Isa ang Bulusan sa mga pinakaaktibong bulkan sa bansa, na huling sumabog noong 2022. Ngayong nasa Alert Level 1 na, pinapayuhan ang mga residente na maging alerto — lalo na sa mga mababang lugar na delikado sa lahar kapag umulan nang malakas.

(Larawan: YouTube)