Bilang tugon sa kakulangan ng ospital at mabagal na serbisyo sa kalusugan, pinirmahan ni Pangulong Ferdinand R. Marcos Jr. ang ilang bagong batas na layong magdagdag ng hospital beds at magtayo ng mga bagong ospital sa iba't ibang panig ng bansa. Isa ito sa mga hakbang para masolusyunan ang siksikan sa mga pampublikong ospital lalo na sa mga lugar na kulang sa access sa healthcare.

Mga Batas para sa Dagdag Hospital Beds

Noong May 8, 2025, nilagdaan ng Pangulo ang anim na batas na nagpapalawak ng kapasidad ng ilang ospital:

• Republic Act No. 12203: Mula 600, naging 1,500 ang kama sa Region 1 Medical Center sa Dagupan City, Pangasinan.

• Republic Act No. 12204: Mula 500, naging 1,000 beds ang Amang Rodriguez Memorial Medical Center sa Marikina City.

• Republic Act No. 12205: Nadagdagan ang San Pedro District Hospital sa Laguna mula 15 hanggang 50 beds.

• Republic Act No. 12207: Nadoble ang kama sa Amai Pakpak Medical Center sa Marawi City, mula 400 naging 800 beds.

Layunin ng mga batas na ito na maibsan ang overcrowding, pabilisin ang serbisyo, at palakasin ang kakayahan ng mga ospital. Inatasan ang DOH na tiyaking may sapat na pasilidad at tauhan para sa mga karagdagang kama.

Bagong Ospital na Itatayo

Kasama rin sa mga batas ang pagtatayo ng dalawang bagong ospital:

• Republic Act No. 12206: Zamboanga del Sur First District Hospital sa Ramon Magsaysay.

• Republic Act No. 12208: Calamba City General Hospital sa Calamba, Laguna.

Tungkulin ng mga LGU na suportahan ang operasyon ng mga ito sa tulong ng DOH.

Karagdagang Batas para sa Mindanao

Noong April 2025, nilagdaan din ni PBBM ang:

• Republic Act No. 12175: Santo Tomas Municipal Hospital sa Davao del Norte.

• Republic Act No. 12176: Dagdag kama mula 25 to 50 sa Tomas Lachica District Hospital sa Davao Occidental.

Makakatulong ito para mas mapalapit ang serbisyong medikal sa mga probinsya.

Kasalukuyang Pending Pa ang PGH Expansion

Samantalang ang ibang batas ay napirmahan na, ang panukalang Senate Bill No. 2928 para sa Philippine General Hospital (PGH) ay hinihintay pa ang pirma ng Pangulo. Layunin nitong itaas ang bed capacity ng PGH mula 1,334 to 2,200.

Naipasa na ito sa Senado at Kamara noong February 2025. Ang PGH ay pangunahing ospital para sa mahihirap, pero madalas ay sobra sa kapasidad, kaya kailangan ang expansion.

Panukalang Mas Pabilisin ang Bed Adjustments

May hiwalay na panukala si Rep. Brian Yamsuan — ang DOH Bed Capacity and Service Capability Rationalization Act — na magbibigay kapangyarihan sa DOH na mag-adjust ng hospital beds kahit walang bagong batas, para mas mabilis ang aksyon.

Puhunan sa Kalusugan ng Bansa

Patuloy ang pahayag ni Pangulong Marcos ukol sa pangarap na maabot ng bawat Pilipino ang maayos na serbisyong medikal. Ang mga bagong batas na ito ay patunay na tinutugunan ng administrasyon ang mga problema sa healthcare system — mula sa overcrowding hanggang sa kakulangan sa pasilidad.

Isa itong hakbang patungo sa mas accessible, mas mabilis, at mas maayos na kalusugan para sa lahat ng Pilipino.


Larawan mula sa DOH Facebook Page