MAYNILA — Inaprubahan ng House of Representatives nitong Lunes sa ikatlo at pinal na pagbasa ang House Bill No. 11287, na layong pahabain mula tatlo hanggang anim na taon ang termino ng mga opisyal ng barangay at Sangguniang Kabataan (SK).

Nakakuha ng 153 boto ang panukala, habang apat ang tumutol at isa ang nag-abstain. Kapag naisabatas, ililipat ng panukala ang susunod na halalan para sa barangay at SK mula Disyembre 2025 patungong Mayo 2029, at magsisimula ang regular na anim-na-taong election cycle pagkatapos nito.

Ayon sa panukala, “All incumbent barangay and SK officials elected last October 30, 2023 shall remain in office until their successors are elected in May 2029, unless sooner removed or suspended for cause.”

Itinatakda rin ng batas ang two-term limit para sa mga barangay official at one-term limit para sa mga SK official. Tanging ang mga nahalal noong 2023 at nasa unang termino pa lang ang maaaring tumakbo muli.

Sinabi ni House Speaker Martin Romualdez, pangunahing may-akda ng panukala, na makatutulong ang pagpapalawig ng termino upang “implement programs more effectively and complete long-term projects.”

Gayunman, umani ng batikos mula sa ilang election watchdogs ang panukala. Binalaan ng Legal Network for Truthful Elections (LENTE) na ang pagpapaliban ng halalan sa 2025 ay posibleng “deprive the electorate of the basic right to choose people who will govern them.”

Naunang nagpasa ang Senado ng sariling bersyon ng panukala—ang Senate Bill 2629—na nagmumungkahi naman ng apat na taong termino at dalawang pagkakataon para muling mahalal. Magkakaroon ng bicameral conference committee upang pag-isahin ang magkaibang probisyon ng dalawang panukala.