HUNYO 16, 2025 — Nagsagawa ang Pilipinas at Japan ng kanilang pangalawang magkasanib na maritime exercises sa West Philippine Sea noong nakaraang linggo, bilang pagpapalakas sa ugnayan sa depensa ilang buwan matapos lagdaan ang isang mahalagang kasunduang militar. Ginanap ang drills matapos ma-ratipika noong Hulyo 2024 ang Reciprocal Access Agreement (RAA), na naglalayong palalimin ang seguridad at kooperasyon ng dalawang bansa.

Kasama sa bilateral exercises ang anti-submarine warfare drills, cross-deck operations, at tactical maneuvers na kinabibilangan ng BRP Miguel Malvar ng Philippine Navy, isang AW159 helicopter, at surveillance aircraft ng Philippine Air Force. Nag-ambag naman ang Japan ng destroyer na JS Takanami at isang SH-60K helicopter.

Binigyang-diin ni Armed Forces of the Philippines chief Gen. Romeo Brawner Jr. ang kahalagahan ng drills, sa pahayag na, “This cooperative activity is more than a display of maritime capability — it is a manifestation of our enduring commitment to uphold peace, stability, and a rules-based order in the Indo-Pacific.”

(Ang kooperatibong aktibidad na ito ay higit pa sa pagpapamalas ng kakayahan sa karagatan — ito ay pagpapakita ng aming matatag na pangako na itaguyod ang kapayapaan, katatagan, at isang umiiral na batas na kaayusan sa Indo-Pacific.)

Nilagdaan ang RAA ni Japanese Foreign Minister Kamikawa Yoko at Philippine Defense Secretary Gilberto Teodoro Jr. bilang tugon sa pagiging agresibo ng China sa South China Sea. Kasunod ito ng trilateral pact noong Abril 2024 sa pagitan ng Manila, Tokyo, at Washington, na naglalayong palawakin ang joint training at suporta sa modernisasyon ng militar ng Pilipinas.

Noong unang bahagi ng taon, nagsagawa rin ng multilateral drills ang Pilipinas, Japan, U.S., at Australia sa parehong karagatan, bilang senyales ng pagkakaisa sa usapin ng maritime security. Ang pinakabagong exercises ay patunay sa pagpupursige ng Manila at Tokyo na pagtibayin ang depensa sa mga pinag-aagawang lugar.

(Larawan: Ambassador of Japan in the Philippines | X)