TAGUM CITY — Mariing kinondena ng University of the Philippines (UP) System ang pagpaslang kay Sophia Marie Coquilla, 19-anyos na estudyante ng UP Diliman, na natagpuang patay sa loob ng kanyang silid sa Barangay La Filipina, Tagum City noong Hulyo 9. Ayon sa imbestigasyon, nagtamo si Coquilla ng 38 saksak at hinihinalang pagnanakaw ang motibo ng krimen.

Sa pahayag ng UP, sinabi nitong “Such a violent act cut short a life full of promise, and robbed the nation of a bright mind and future leader. We grieve over the loss of a daughter, classmate, friend, and Iskolar ng Bayan.” Nanawagan ang unibersidad para sa mabilis, malinaw, at masusing imbestigasyon, at hinikayat ang mga awtoridad na panagutin ang mga salarin.

Batay sa ulat ng pulisya, apat ang sangkot sa krimen. Dalawa sa kanila, edad 14 at 17, ay menor de edad at naaresto sa isang boarding house wala pang 24 oras matapos ang insidente. Narekober mula sa kanila ang laptop, iPad, iPhone, at mga relo ni Coquilla, pati na ang isang kutsilyong butterfly at kutsilyong pangkusina na may dugo at pinaniniwalaang ginamit sa pananaksak.

Ayon kay Davao del Norte Police Provincial Director Col. Alexander Serrano Jr., nagpasya ang mga suspek na patayin si Coquilla matapos siyang makilala. “This operation is a clear demonstration of DNPPO’s swift and unwavering commitment to justice. We will not rest until all those responsible are held accountable,” ani Serrano.

Patuloy pa ring pinaghahanap ang dalawang iba pang suspek at nagpapatuloy ang manhunt operation. Nag-uumapaw ang galit ng publiko dahil sa insidente, kung saan marami ang nananawagan na muling pag-aralan ang Juvenile Justice and Welfare Act of 2006 na nagbibigay proteksyon sa mga menor de edad na nasasangkot sa krimen.

Nagpahayag ng pakikiramay si Tagum City Mayor Rey Uy at nangakong kikilos: “Dili kita muundang hangtod makab-ot nato ang hustisya... Walay lugar ang mga kriminal diri sa atong syudad,” ayon sa kanyang post sa Facebook.

Nag-alok ng psychosocial support ang UP para sa pamilya ni Coquilla at sa komunidad ng unibersidad, kasabay ng pagdiin sa pangangailangang protektahan ang buhay at igiit ang hustisya. Naglalagablab ngayon ang panawagan para sa mas matibay na mga hakbang laban sa krimen at pananagutan ng mga menor de edad na sangkot.