Muling inihain ni Senador Panfilo "Ping" Lacson ang kanyang panukalang batas na tinatawag na Parents Welfare Act of 2025, na layong bigyan ng legal na proteksyon ang mga matatanda, may sakit, o di na kayang alagaan ang sarili, lalo na kung sila ay pinapabayaan ng kanilang sariling mga anak.

Ang panukala ay nakabatay sa mahahalagang kulturang Filipino tulad ng paggalang at pagmamalasakit sa magulang, ngunit may kalakip na mga parusa para sa mga anak na lumilimot sa kanilang responsibilidad.

Mga Pangunahing Probisyon ng Parents Welfare Act of 2025

1. Obligasyong Legal na Alagaan ang Matatandang Magulang

Ayon sa panukala, ang mga anak ay may legal na tungkulin na suportahan, pinansyal man o emosyonal—ang kanilang magulang kung ito ay matanda na, may malubhang sakit, o hindi na makagalaw nang maayos.

• Maaaring magsampa ng petisyon sa korte ang mga magulang para pilitin ang mga anak na gampanan ang kanilang tungkulin.

• Ang Public Attorney’s Office (PAO) ang magbibigay ng libreng abogado.

• Walang babayarang filing fee o court fee ang magulang.

2. Parusa sa Hindi Pagsuporta

Kung ang isang anak ay hindi nagbibigay ng suporta sa loob ng tatlong sunod-sunod na buwan nang walang sapat na dahilan, ito ay may kaukulang parusa.

• Parusa: Kulong ng 1 hanggang 6 na buwan o multang ₱100,000.

Layunin nito na tugunan ang mga kasong sadyang pagpapabaya kahit may kakayahang tumulong.

3. Mas Mabigat na Parusa sa Pag-abandona

Kung ang isang anak ay sadyang iniiwan ang kanyang magulang, lalo na kung ito ay may sakit, may kapansanan, o lubhang matanda na—mas mabigat ang parusang nakalaan.

• Parusa: 6 hanggang 10 taong pagkakakulong at minimum na multang ₱300,000.

Ito ay para sa mga extreme na kaso ng pagpapabaya kung saan talagang iniwan na nang tuluyan ang magulang.

4. Mediation o Pag-aayos ng Pamilya

Bago hatulan o parusahan, inaatasan ang korte na idaan muna sa family mediation ang magkabilang panig. Layunin nito na ayusin ang sigalot at maibalik ang pagkakaisa ng pamilya.

• Gagawin ang mediation sa tulong ng mga eksperto sa family law at counseling.

5. Pagpapatayo ng Elderly Homes

Bilang karagdagang suporta, ipinag-uutos din sa panukala ang pagtatayo ng mga institusyon para sa matatanda na wala nang maaasahang pamilya.

• Lahat ng probinsya at highly urbanized cities ay kailangang magpatayo ng isang “Old Age Home” na kayang tumanggap ng hindi bababa sa 50 residente.

• May libreng tulugan, pagkain, at medical support para sa mga matatandang pinabayaan.

6. Responsibilidad ng Apo kung Wala ang Anak

Kapag wala na ang anak—dahil sa pagkamatay o kawalan ng kakayahan, maaaring ilipat ang obligasyon sa mga apo, ayon sa pagkakasunod-sunod na itinatakda ng batas.