San Fernando City, La Union – Matinding pinsala ang iniwan ni Bagyong Emong sa lungsod ng San Fernando, La Union matapos ang kanyang pag-landfall sa Hilagang Luzon noong Hulyo 24–25, 2025. Matapos ang halos buong gabing buhos ng ulan at bugso ng hangin, maraming barangay ang nalubog sa baha, at nalalagas ang kabuhayan ng daan-daang residente.

Dakong madaling araw ng Hulyo 25, tuluyan nang naramdaman ang hagupit ng bagyo sa lungsod. Naitaas ang Signal No. 4 sa rehiyon, dahilan upang lumikas ang maraming pamilya sa mas ligtas na lugar. Ang walang patid na ulan ay nagdulot ng pag-apaw sa mga ilog at pagbaha sa mga pangunahing lansangan sa lungsod.

Bukod sa pagbaha, ilang imprastruktura ang naapektuhan. Maraming puno ang nabuwal, mga bakod at poste ng kuryente ang nagbagsakan, at ilang gusali ang bahagyang nasira. Sa social media, makikita ang mga larawang nagpapakita ng lawak ng pinsalang iniwan ni Emong sa mga kabahayan at pampublikong lugar.

Ayon sa ulat ng La Union Electric Cooperative (LUELCO), mahigit 509,000 kabahayan sa lalawigan ang nawalan ng kuryente. Tinatayang nasa ₱4 milyon ang halaga ng nasirang kagamitan sa suplay ng kuryente. Sa kasalukuyan ay patuloy pa rin ang restoration efforts ng mga linya ng kuryente.

Nagsimula na rin ang mga awtoridad sa damage assessment habang tuluy-tuloy ang pagresponde ng mga rescue team at disaster response units sa mga apektadong barangay. Inaasahan ang agarang pamamahagi ng relief goods sa mga evacuee.

Bagamat humina na ang bagyo at lumabas ng Philippine Area of Responsibility (PAR), nananatiling nakaalerto ang mga residente dahil sa posibilidad ng after-flooding at landslide sa mga bulubunduking bahagi ng lungsod.