Inanunsyo ng Bureau of Internal Revenue (BIR) ang opisyal na paglulunsad ng Value-Added Tax (VAT) on Digital Services (VDS) Portal, isang makabagong hakbang tungo sa digitalisasyon ng pagbubuwis sa bansa.

Simula ngayong Hulyo 30, 2025, bukas na para gamitin ang VDS Portal na magbibigay-daan sa mga Nonresident Digital Service Providers (NRDSPs) na magparehistro, magsumite ng VAT returns, at magbayad ng kaukulang buwis ayon sa itinakdang patakaran ng Revenue Regulations No. 003-2025.

Ang portal na ito ay bahagi ng pagpapatupad ng Republic Act No. 12023, na nagpapataw ng VAT sa mga digital services na ginagamit at kinokonsumo sa loob ng Pilipinas. Ayon sa batas, ang "digital services" ay tumutukoy sa mga serbisyong ibinibigay gamit ang internet o electronic networks, na awtomatiko ang proseso gamit ang teknolohiya.

Layunin ng bagong sistema na gawing mas madali, mabilis, at transparent ang proseso ng pagbabayad ng buwis para sa mga dayuhang digital service providers tulad ng online streaming platforms, cloud storage services, at iba pang internet-based services na may operasyon sa Pilipinas.

Maaaring i-access ang VDS Portal sa pamamagitan ng link na ito: https://vds.bir.gov.ph

Para sa karagdagang impormasyon, maaaring mag-scan ng QR code na nasa opisyal na anunsyo, magpadala ng email sa vat_dsp@bir.gov.ph, o bumisita sa opisyal na BIR website sa www.bir.gov.ph.

Ito ay isang hakbang ng BIR patungo sa mas sistematikong pagbubuwis sa digital economy, kasabay ng layunin ng pamahalaan na makasabay sa makabagong teknolohiya sa serbisyo publiko.

(Source: BIR)

(Larawan: BIR Facebook)