ARITAO, NUEVA VIZCAYA — Timbog ang isang babae matapos mahulihan ng may kabuuang 18 sachets ng hinihinalang shabu sa bisa ng search warrant operation na ikinasa ng pinagsanib na pwersa ng Philippine National Police (PNP) at Philippine Drug Enforcement Agency (PDEA) sa Barangay Bone North, Aritao nitong Huwebes.

Kinilala ang suspek na si Mary Jane, na naaktuhan di-umano sa pag-iingat ng 15 medium-sized sachets ng shabu, ang bawat isa ay may timbang na tig-iisang (1) gramo. Sa pagpapatuloy ng paghahalughog sa loob ng kanyang tahanan, ikinagulat ng mga operatiba nang makitang nakatago pa ang tatlong (3) karagdagang sachets ng droga sa loob mismo ng isang bible, tinatayang nagkakahalaga ng ₱1,020.

Maliban sa mga pakete ng droga, nakumpiska rin mula sa suspek ang isang cellphone, coin purse, at lighter, na pinaniniwalaang ginagamit sa ilegal na aktibidad ng bentahan at paggamit ng ipinagbabawal na gamot.

Ayon sa ulat ng mga otoridad, ang search warrant ay ipinagkaloob ng korte sa Nueva Vizcaya matapos makatanggap ng impormasyon hinggil sa umano’y talamak na pagbebenta ng shabu sa lugar. Sa mismong operasyon, napuna ng mga pulis na tila may nilulunok si Mary Jane — dahilan para maghinala ang mga operatiba na posibleng tinangka ng suspek na ingestin o lunukin ang ilan pang sachet ng shabu upang maitago bilang ebidensya.

Hindi naman naabutan sa naturang operasyon ang live-in partner ng suspek na kabilang din sa target ng search warrant. Kasalukuyan pa itong pinaghahanap ng mga awtoridad at pinaniniwalaang tumakas bago dumating ang mga operatiba.

Ang suspek ay kasalukuyang nasa kustodiya ng pulisya at sasampahan ng mga kasong paglabag sa Republic Act No. 9165 o Comprehensive Dangerous Dr&gs Act of 2002.

Nagbabala naman ang mga law enforcement agencies na hindi sila titigil sa kanilang pinaigting na kampanya laban sa ilegal na droga sa lalawigan. Ayon sa PNP, kanilang layunin ay tuluyang maagapan ang pagkalat ng droga mula sa malalaking sindikato hanggang sa mga street-level distributor.

Sa panahon ngayon, ang mga ganitong operasyon ay kadalasang nagiging laman ng social media. Ang mga kuhang larawan o bidyo ng eksena ay mabilis na nagva-viral dahil sa mabilis na interes ng netizens — lalo na kung tumatagos sa kanilang emosyon. Patunay lamang ito na sa likod ng bawat viral post ay mga istoryang totoong nangyayari sa komunidad, at mas nagiging epektibong paraan ito upang lahat ay mamulat at makiisa sa laban kontra ilegal na droga.

(Source: Kami.com.ph)

(Larawan: Robel Almoguerra)