MAYNILA — Mabilis na inaksyunan ng pamahalaang lungsod ng Maynila ang insidente ng isang lalaking naging viral sa social media dahil sa kanyang nakahambalang na sidecar na nagdulot ng matinding trapiko sa Tondo. Tinaguriang "Lowbat Boy" ng netizens, ang lalaki ay agad na inaresto ng Manila Police District (MPD) at dinala sa City Hall matapos makatanggap ng mga reklamo mula sa publiko.

Ang insidente ay unang nai-post sa Facebook, kung saan makikita ang sidecar na nakaharang sa Quezon Street papuntang Herbosa, isang abalang kalsada sa Tondo. Bukod sa nakaparadang sagabal, makikita rin ang lalaking tila matapang na sinisigawan ang ibang motorista. Kaya naman umani ito ng batikos mula sa publiko at tinawag na “siga-siga sa kalsada.”

Sa opisyal na pahayag mula sa lungsod ng Maynila, sinabi nito:

“Uulitin ko: May gobyerno na po sa Maynila! Hindi na puwedeng ’yung siga-siga at perwisyong ginagawa sa kalsada.”

Bilang babala, binigyang-diin din ng lungsod na:

“Ngayon, pitik lang muna sa tenga. Pero sa susunod na lumabag kayo sa mabigat na batas, talagang may kakalagyan kayo!”

Nagpasalamat ang pamahalaang lungsod sa mga netizen na agad nag-report at nag-tag sa mga opisyal na page ng lungsod. Ayon sa Manila PIO, dahil sa pakikiisa ng mamamayan, mabilis nilang naresolba ang sitwasyon.

 “Tuloy-tuloy lang po ang pag-tag sa ating pamahalaang lungsod, at agad naming tinutugunan ’yan.”

Ang mabilis na aksyon sa "Lowbat Boy" ay bahagi ng pinaigting na kampanya ng lokal na pamahalaan laban sa mga sagabal sa daan, illegal parking, at mga pasaway sa kalsada. Ayon sa mga opisyal, ang ganitong mga insidente ay hindi na palalampasin upang masigurong maayos at ligtas ang daloy ng trapiko sa Maynila.