ANTIPOLO CITY — Umabot na sa 70 kabataan ang nahuli sa lungsod ng Antipolo dahil sa paglabag sa curfew ordinance, ayon sa ulat ng lokal na pamahalaan ngayong Agosto 6, 2025.

Sa paunang tala, 20 kabataan ang naunang nahuli sa magkakahiwalay na barangay. Ngunit pagsapit ng alas-7:14 ng umaga, tumaas ang bilang ng mga kabataang nasa kustodiya ng mga awtoridad sa 50, na hindi pa sinusundo ng kanilang mga magulang o guardian.

Ayon sa lokal na pamahalaan, layunin ng curfew ordinance na mapanatili ang kaayusan at kaligtasan ng mga kabataan, lalo na sa gabi kung kailan mas mataas ang panganib ng krimen, aksidente, o maling impluwensiya.

Bagama’t umaasa ang mga opisyal na bababa na ang bilang ng mga lumalabag, ikinabahala ng mga otoridad ang pagtaas ng bilang ng kabataang nahuhuli sa mga nakaraang araw.

“Pababa sana ang numerong ito habang tumatagal, hanggang mag-zero na ng tuluyan. Hindi pataas,” saad ng opisyal na pahayag mula sa city office.
“Salamat po sa pang-unawa at pakikiisa.”

Patuloy ang paalala ng lokal na pamahalaan sa mga magulang na bantayang mabuti ang mga anak at siguraduhing nasa loob ng tahanan sa oras ng curfew.

Dagdag pa rito, pinaalalahanan din ang publiko na ang disiplina sa tahanan ang unang hakbang sa pagpapanatili ng ligtas at maayos na komunidad. Plano rin ng LGU na magsagawa ng counseling sessions at seminars para sa mga magulang at kabataang lumabag, bilang bahagi ng hakbangin tungo sa mas responsableng pamumuhay.

Patuloy ang operasyon ng mga awtoridad sa pagpapatupad ng curfew, kasabay ng panawagan para sa kooperasyon ng buong komunidad.

Para sa iba pang detalye kaugnay ng ordinansang ito, maaaring bumisita sa link na ito: https://www.facebook.com/share/p/16vbsnhGW2/?mibextid=wwXIfr

(Larawan: Jun-Andeng Ynares Fb)