AGOSTO 7, 2025 — Isang police K9 na nag-trending dahil sa payat na itsura ay aktwal na malusog at nasa "transition phase" lamang kasama ang bagong handler nito, ayon sa Philippine National Police (PNP).

Si Kobe, isang Belgian Malinois na bomb-sniffing dog, ay nakumpleto ang anim na buwang training sa Regional EOD K9 Unit bago ilipat sa Manila Police District. Ayon kay Police Maj. Alejandro Parta ng Regional Explosive Canine Unit–NCR, normal ang pagbabago sa hitsura ng aso habang ina-adjust nito ang routine kasama ang bagong handler.

“Undergoing po siya ng transition with his new handler po … expected ko na magkakaroon ng pagbabago sa pangangatawan niya,” pahayag ni Parta.

Kinumpirma ni Patrolman Victor Paulo Dy Buco, ang bagong handler ni Kobe, na regular ang check-up, bakuna, at pagkain ng aso. Ayon pa sa kanya, tatlong beses kumakain sa isang araw si Kobe.

Nagobserba rin si Commissioner Ralph Calinisan ng National Police Commission (Napolcom) matapos bisitahin ang EOD K9 Unit. 

"Yung mga aso naman dun, may demonstration na ginawa sakin, and all of the dogs I saw were all fit (lahat ng asong nakita ko ay fit),” sabi niya.

Nag-abot ng donasyon ng dog food sina Calinisan at columnist Ramon Tulfo, na unang nag-post ng litrato ni Kobe. Hinimok din ang publiko na huwag husgahan agad si Dy Buco, na isang person with disability (PWD).

“May deperensya lang po sa aking katawan … May fracture po ako sa upper body,” paliwanag ni Dy Buco.

Ayon kay Police Col. Jonathan Abella ng PNP EOD K9 Group, may 398 active K9 dogs sa bansa, subalit marami ang magre-retire sa susunod na dalawang taon. Kasalukuyang kumukuha ang PNP ng 100 bagong aso para punan ang kakulangan.

Giit ng EOD K9 Group, lahat ng alagang aso nila ay nasa maayos na kalagayan.

(Larawan: Philippine Animal Rescue Team (P.A.R.T.) | Facebook)