AGOSTO 11, 2025 — Isinusulong ng Surigao second district Rep. Bernadette Barbers ang isang panukalang batas para pigilan ang ilegal na pag-park, pagtitinda, at paninira sa mga sidewalk at pampublikong kalsada sa mga lungsod. Layon ng House Bill (HB) 933 na ayusin ang disiplina sa daan at bigyang-daan ang mas ligtas at maayos na trapiko.

Ayon kay Barbers, ang pagiging abala ng mga kalsada at sidewalk ay isa sa mga pangunahing sanhi ng matinding traffic sa mga urban area, lalo na sa Metro Manila. 

Ayon pa sa kongresista, dapat na italaga ang mga sidewalk para sa mga pedestrian lamang, ngunit sa kasalukuyan ay inaagaw ito ng mga vendor at iba pang istruktura. Dahil dito, wala nang choice ang mga tao kundi maglakad sa mismong kalsada, na nagdudulot ng panganib. Dagdag pa rito, ginagawang parking lot ang mga daan ng mga walang sapat na paradahan, na siya namang nagpapalala sa problema sa trapiko. 

Binigyang-diin niyang kailangang matigil na ang ganitong mga gawain.

Binanggit din ng kongresista ang mga pag-aaral na nagpapakita ng malaking epekto ng traffic sa ekonomiya at pang-araw-araw na buhay ng mga Pilipino. 

Sa ilalim ng HB 933, mahigpit na ipagbabawal ang paggamit ng kalsada bilang parking area, terminal, o lugar para sa negosyo nang walang permiso mula sa lokal na pamahalaan.

Kabilang sa mga parusa ang multa mula P1,000 hanggang P10,000, pag-alis ng mga istrukturang nakaharang, at pag-impound sa mga sasakyang naka-park nang ilegal. 

"This bill is about restoring discipline, fairness, and safety on our streets. Sidewalks are for pedestrians. Roads are for vehicles. When we respect that, we move better as a society," dagdag ni Barbers.

(Layunin ng panukalang batas na ito na ibalik ang disiplina, patas na paggamit, at kaligtasan sa ating mga lansangan. Para sa mga pedestrian ang mga sidewalk. Para naman sa mga sasakyan ang mga kalsada. Kapag iginagalang natin ito, mas magiging maayos ang daloy ng ating lipunan.)

Nanawagan ang mambabatas sa Kongreso para sa agarang aksyon, at binigyang-diin na ang maayos na transportasyon ay kritikal sa pag-unlad ng bansa.

(Larawan: Philippine News Agency)