Manila - Sa panukalang 2026 national budget na inihain ng pamahalaan, nakalaan ang P129.9 bilyon para sa Pantawid Pamilyang Pilipino Program (4Ps). Ayon sa Department of Budget and Management (DBM), layunin ng pondong ito na matulungan ang mahigit 4.4 milyong mahihirap na pamilya sa bansa. Kabilang sa mga benepisyo ang cash grants, ayuda sa bigas, at suporta para sa kalusugan at edukasyon ng mga bata, lalo na sa unang 1,000 araw mula pagbubuntis hanggang sa ikalawang taon ng bata.

Samantala, walang inilaan na pondo para sa Ayuda para sa Kapos ang Kita Program (AKAP) sa 2026 budget. Paliwanag ng DBM, may natitirang pondo pa mula sa 2025 kaya’t hindi na ito isinama sa susunod na taon. Ang AKAP ay nakatanggap ng P26 bilyon noong 2025 para sa ayuda sa mga minimum wage earners, ngunit ngayon ay hindi muna bibigyan ng bagong alokasyon.

Binigyang-diin ng DBM na limitado ang fiscal space ng pamahalaan, kaya mas pinili nilang ituon ang pondo sa mga programang may agarang epekto sa mahihirap na pamilya, gaya ng 4Ps. Dagdag pa nila, patuloy naman nilang imo-monitor ang sitwasyon ng AKAP at ang natitirang pondo nito upang magdesisyon kung kailangan pa itong dagdagan sa hinaharap.

Ang 4Ps at AKAP ay parehong nasa ilalim ng social protection programs ng gobyerno, ngunit ngayong taon ay mas nakatutok ang pondo sa pagpapatuloy at pagpapalakas ng 4Ps.