CABANATUAN CITY — Matapos patawan ng isang taong suspensiyon ng Office of the Ombudsman, iginiit ni Nueva Ecija Governor Aurelio Umali na wala siyang nilabag na batas kaugnay sa pag-isyu ng 205 quarry permits sa lalawigan mula 2014 hanggang 2016.

Sa 29-pahinang desisyon ng Ombudsman, napatunayang si Umali ay “guilty of conduct prejudicial to the best interest of the service and simple misconduct” dahil sa pag-apruba ng mga Commercial Sand and Gravel Permits (CSGPs) nang walang Environmental Compliance Certificate (ECC) mula sa Department of Environment and Natural Resources (DENR).

Ayon sa Ombudsman, “There is a basis to hold Aurelio Umali administratively liable. He was remiss in his duty to ensure the enforcement and compliance with all laws, rules and regulations within his jurisdiction”. Ang suspensiyon ay alinsunod sa Section 25 (2) ng Republic Act 6770 o Ombudsman Act of 1989, at Section 10 (b), Rule III ng Administrative Order No. 7.

Ngunit sa panig ni Umali, mariin niyang itinanggi ang paratang ng katiwalian. Aniya, “The made-up criminal complaint was dismissed and that the one-year suspension ruling of the Office of the Ombudsman is administrative in nature in connection with the interpretation and implementation of the law”.

Dagdag pa ng gobernador, ang kanyang aksyon ay hindi bunga ng “premeditated, obstinate, or intentional purpose,” kaya’t hindi ito dapat ituring na katiwalian.

Ang reklamo ay isinampa ni Roberto Duldulao noong Marso 2024, kung saan ibinunyag ang umano’y paglabag ng probinsya sa Philippine Mining Act of 1995 (RA 7942) sa pamamagitan ng pag-isyu ng quarry permits sa mga hindi kuwalipikadong aplikante na walang ECC. Sa halip, LECC o Local Environmental Clearance Certificate lamang ang hinihingi ng pamahalaang panlalawigan.

Samantala, ibinasura ng Ombudsman ang mga reklamo laban sa asawa ni Umali na si dating Gov. Czarina Umali, dating PENRO Wilfredo Pangilinan, at apat na dating regional directors ng DENR-MGB Region 3 dahil sa kakulangan ng ebidensya.

Ang desisyon ay inaprubahan ni Ombudsman Samuel Martires sa rekomendasyon nina Assistant Ombudsman Pilarita Lapitan at Graft Investigation and Prosecution Officer Leilani Tagulao-Marquez.

Sa kabila ng suspensiyon, nanindigan si Gov. Umali na ipaglalaban niya ang kanyang karapatan at patuloy na maglilingkod sa mga Novo Ecijano.

Larawan mula sa Aurelio Oyie Matias Umali FB page