Subic - Itinapon ng Bureau of Customs (BOC) sa Subic, Zambales ang limang container na naglalaman ng iba’t ibang produktong agrikultural na ipinuslit papasok sa bansa.

Ayon sa BOC, natuklasang walang kaukulang phytosanitary certificate at iba pang dokumento ang kargamento kaya agad itong isinailalim sa disposal sa isang pasilidad sa loob ng Subic. Ang mga produkto ay kinabibilangan ng frozen meat, isda, preserved fruits at gulay.

Paliwanag ng ahensya, ang hakbang ay bahagi ng kanilang kampanya laban sa agricultural smuggling na nagdudulot ng pinsala sa kalusugan ng publiko at banta sa lokal na agrikultura. Ang mga hindi dumaan sa tamang inspeksyon ay maaaring magdala ng sakit at peste na makasisira sa mga pananim at hayop.

Isinagawa ang disposal alinsunod sa Customs Memorandum Order No. 24-2021 upang matiyak na ang mga produktong hindi ligtas kainin ay hindi na makararating sa pamilihan.

Tiniyak ng BOC na patuloy nilang paiigtingin ang pagbabantay sa mga pantalan katuwang ang Department of Agriculture at iba pang ahensya ng gobyerno. Nanawagan din sila sa publiko na suportahan ang mga lokal na magsasaka sa pagbili ng produktong Pilipino na dumaan sa tamang proseso.

Larawan mula sa Boc