PAMPANGA — Isang bihirang tagpo sa larangan ng pulitika ang nasaksihan sa lalawigan ng Pampanga matapos magkaisa ang lahat ng 19 na alkalde mula sa iba’t ibang bayan upang pirmahan ang isang kasunduan laban sa korapsyon.

Pinangunahan ng Pampanga Mayors League, sa pamumuno ni Mayor Jun Tetangco, ang makasaysayang pagtitipon kung saan naglagda ang bawat punong-bayan ng isang covenant na naglalayong isulong ang transparency, accountability, at integrity sa kanilang pamamahala.

Ayon kay Tetangco, mahalaga ang pagkakaisang ito upang patunayan na ang tiwala ng taumbayan ay hindi basta-basta mabibili o maitatago sa likod ng mga maling gawain. “Ang bawat pisong pondo ng bayan ay dapat mapunta sa mga proyektong tunay na nakikinabang ang mamamayan,” aniya.

Ipinahayag ng mga alkalde na tungkulin nilang tiyakin na ang kaban ng bayan ay mapupunta sa makabuluhang proyekto tulad ng edukasyon, kalusugan, imprastraktura, at serbisyong panlipunan. Dagdag pa rito, nangako silang magiging bukas ang kanilang mga tanggapan sa mga mekanismo ng public accountability upang mapalakas ang tiwala ng mga mamamayan sa pamahalaan.

Para sa mga Kapampangan, isang senyales ito na may pag-asa pa para sa mas malinis at mas tapat na pamamahala. Sa halip na magkanya-kanya, nagpasya ang mga lokal na opisyal na magtulungan laban sa isang kalaban na matagal nang sumisira sa lipunan—ang korapsyon.

Bagama’t nananatiling hamon ang pagpapatupad ng nasabing kasunduan, umaasa ang mga residente ng Pampanga na hindi lamang ito mananatili sa papel kundi magiging tunay na gabay sa araw-araw na pamumuno ng kanilang mga alkalde. (Larawan: Pampanga PIO / Fb)