MANILA — Uminit ang bangayan sa pagitan ng dalawang beteranong mambabatas matapos banatan ni Cavite 4th District Representative Kiko Barzaga si Senate President Vicente “Tito” Sotto III kaugnay ng umano’y limitadong saklaw ng imbestigasyon sa flood control scam.

Sa isang matapang na pahayag, sinabi ni Barzaga: “Discaya lang kaya mo, takot ka kay Romualdez!”, patungkol sa Senate hearings na nakatuon lamang sa mag-asawang kontratista na sina Curlee at Sarah Discaya, habang nananatiling tahimik umano ang Senado sa mga alegasyon laban kay House Speaker Martin Romualdez.

Giit ni Barzaga, hindi sapat ang pagtutok sa mga contractor kung hindi rin babanggitin ang mga mambabatas na may posibleng kinalaman sa anomalya. “Ngayon na wala na ako sa partido, wala na akong kinikilingan. Dapat imbestigahan si Romualdez. Hindi lang Discaya ang dapat tanungin,” aniya.

Kaugnay nito, matatandaang noong Miyerkules, Setyembre 10, sinagot ni Sotto ang patutsada ni Barzaga at itinangging may kinikilingan siya sa isinasagawang imbestigasyon. “There are many points he is missing. I’ve been a longtime friend of Martin Romualdez, Toby Tiangco, Albee Benitez, Benny Amante, Leila De Lima, Caloy Zarate, Paolo Duterte etc etc and many oldtimers in the HOR,” ani Sotto, bilang tugon sa akusasyong nalilimitahan ang imbestigasyon dahil sa personal na koneksyon.

Hindi pa rin bumibitaw si Barzaga sa panawagan para sa mas malawak na accountability. Matatandaang siya ay nagbitiw mula sa National Unity Party at majority bloc sa Kamara, kasunod ng umano’y “betrayal of trust” sa loob ng partido. Sa kanyang mga pahayag, binigyang-diin niya na ang kanyang paninindigan ay para sa katotohanan at hindi personal na laban.

Sa gitna ng mga sagutan, patuloy ang pag-usbong ng mga pangalan sa flood control controversy, habang nananawagan ang publiko ng mas malalim na imbestigasyon—hindi lamang sa mga contractor, kundi pati sa mga mambabatas na may hawak ng pondo. Sa mga susunod na araw, inaasahang lalong iinit ang bangayan sa pagitan ng Senado at Kamara.