SETYEMBRE 16, 2025 — Nagulantang ang Kamara nitong Lunes nang biglang pumasok si Cavite 4th District Rep. Francisco “Kiko” Barzaga sa opisina ni Majority Leader Ferdinand Alexander Marcos upang magkampanya para sa posisyon ng Speaker. Ayon kay Deputy Speaker Ronaldo Puno, hindi inaasahan ang kilos ni Barzaga at tila hindi ito naaayon sa inaasahang asal ng isang mambabatas.

Sa isang press briefing, inilahad ni Puno na isinara ni Barzaga ang pinto ng opisina ni Marcos, pinaupo ang mga tao sa loob, at nagsimulang magpahayag ng kanyang plano para sa Kamara. 

Sinabi umano ni Barzaga, “Everybody sit down. I want to tell you about my plans for what to do with Congress. I am running for Speaker.” 

(Umupo kayong lahat. Gusto kong ipaliwanag ang plano ko para sa Kongreso. Tatakbo ako bilang Speaker.)

Bukod pa rito, nilapitan umano ni Barzaga ang ilang mambabatas at inalok ng posisyon kapalit ng suporta. 

“‘You,’ he said, ‘if you will join me, I will make you deputy speaker.’ That was how he talked,” dagdag ni Puno.

(“Ikaw,” aniya, “kapag sumama ka sa akin, gagawin kitang deputy speaker.” Ganyan siya magsalita.)

Bagamat nabigla ang mga nasa loob ng opisina, pinakinggan pa rin si Barzaga. Wala umanong nangyari sa naturang pulong, kaya’t lumabas ito at nagpatuloy sa pangangampanya sa plenaryo.

“Then I think, I just came from the session hall, at the plenary, he went around, he is campaigning to be Speaker. And he said he is going to declare all seats vacant, something like that,” ayon kay Puno. 

(Pagkatapos, galing ako sa session hall, sa plenaryo, umiikot siya, nangangampanya bilang Speaker. Sinabi niyang ideklara raw na bakante ang lahat ng puwesto, parang gano’n.)

Dahil sa sunod-sunod na insidente, nagpasya ang National Unity Party (NUP) na dalhin ang usapin sa House ethics committee. Ayon kay Puno, apat na posibleng paglabag ang nakita sa kilos ni Barzaga:

• Hindi pag-uugali ng isang mambabatas na nagbibigay dangal sa Kamara
• Pagsasagawa ng mga aksyong salungat sa batas, moralidad, kaugalian, at pampublikong patakaran
• Pag-uugali na maaaring mag-udyok ng sedisyon
• Gawi na hindi kapaki-pakinabang sa serbisyo at hindi nararapat sa isang miyembro ng Kongreso

“We are going to make a motion, our party, to bring this whole issue to the ethics committee because there are a number of things that we feel need to be clarified in terms of proper behavior here in Congress,” ani Puno. 

(Maghahain kami ng mosyon, ang aming partido, upang dalhin ang buong isyung ito sa ethics committee dahil may mga bagay na kailangang linawin tungkol sa tamang asal sa Kongreso.)

Hindi umano isyu ang mga opinyon ni Barzaga laban sa pamahalaan, kundi ang paraan ng kanyang pagpapahayag na maaaring magdulot ng maling impresyon sa publiko. Sa gitna ng mga kontrobersiyang kinakaharap ng Kamara, nais ng NUP na mapanatili ang tiwala ng taumbayan.

“What we are concerned about is people might think, especially now that Congress is under siege, we are all under a microscope, we are monitored about our behavior, about everything,” paliwanag ni Puno. 

(Ang ikinababahala namin ay baka isipin ng mga tao, lalo na ngayong binabantayan ang Kongreso, na wala kaming kontrol sa aming asal at kilos.)

Dagdag pa ni Puno, mahirap para sa NUP na disiplinahin si Barzaga dahil sa koneksyon nito sa partido. Anak siya ng yumaong Rep. Elpidio “Pidi” Barzaga, isa sa mga tagapagtatag ng NUP, at ni Dasmariñas Mayor Jenny Barzaga.

“We talked with our party-mates … of course, all of us are friends of (late) Congressman Pidi Barzaga and the wife, Mayor Jenny. So we just let him be, but the problem got out of hand,” ani Puno. 

(Nag-usap kami ng mga kasamahan sa partido … siyempre, kaibigan namin si Congressman Pidi Barzaga at si Mayor Jenny. Kaya hinayaan na lang namin siya, pero lumala ang problema.)

Sa kabila ng koneksyon, sinabi ni Puno na hindi na maaaring palampasin ang mga kilos ni Barzaga. 

“I know he is not well, but we cannot allow this behavior to be not responded to. Somebody has to discipline this boy,” aniya. 

(Alam kong hindi siya maayos, pero hindi puwedeng palampasin ang ganitong asal. Kailangang may magdisiplina sa batang ito.)

Umalis na si Barzaga sa NUP matapos umanong komprontahin kaugnay ng panawagan niyang palitan si Speaker Ferdinand Martin Romualdez. Kasunod nito, sunod-sunod ang mga post ni Barzaga sa social media na nag-uugnay sa ilang opisyal ng pamahalaan sa katiwalian.

Sa ngayon, naghahanda na ang NUP na magsumite ng pormal na reklamo sa ethics committee upang imbestigahan ang mga kilos ni Barzaga. Layunin ng hakbang na ito na linawin ang mga pamantayan ng asal sa loob ng Kamara at mapanatili ang integridad ng institusyon.

(Larawan: @kikobarzaga | Instagram)