QUEZON PROVINCE — Ipinahayag ng Pamahalaang Panlalawigan ng Quezon na suspendido ang lahat ng klase sa antas ng kolehiyo at post-graduate sa buong lalawigan sa darating na Oktubre 18–19, Sabado at Linggo, bilang pag-iingat sa posibleng masamang epekto ng Bagyong Ramil.

Ayon sa abiso, ang suspensyon ng klase ay ipinatupad upang matiyak ang kaligtasan ng mga mag-aaral, guro, at kawani ng mga paaralan habang patuloy ang pagbabantay ng Philippine Atmospheric, Geophysical and Astronomical Services Administration (PAGASA) sa bagyo na kasalukuyang kumikilos sa direksyong hilagang-kanluran.

Gayunman, nilinaw ng pamahalaang panlalawigan na hindi saklaw ng anunsyo ang Lungsod ng Lucena, dahil ito ay itinuturing na Highly Urbanized City (HUC) at may sariling pamunuan na magpapasya kung magkakaroon din ng kanselasyon ng klase sa kanilang nasasakupan.

Pinayuhan ng Provincial Disaster Risk Reduction and Management Office (PDRRMO) ang lahat ng residente na manatiling alerto at mag-ingat, lalo na sa mga lugar na mababa at madaling bahain. Iminungkahi rin na patuloy na subaybayan ang mga opisyal na update mula sa PAGASA at lokal na pamahalaan upang makaiwas sa disimpormasyon.

Dagdag pa rito, tiniyak ng mga awtoridad na nakahanda na ang mga emergency response teams sakaling lumala ang lagay ng panahon.

“Manatiling alerto at ligtas,” paalala ng pamahalaang panlalawigan sa lahat ng mamamayan ng Quezon. (Larawan: Doktora Helen Tan / Facebook)