MANILA — Kinumpirma ng Philippine Atmospheric, Geophysical and Astronomical Services Administration (PAGASA) na ang tropical depression sa labas ng Philippine Area of Responsibility (PAR) ay lumakas na at isa nang tropical storm na may international name na Fung-Wong.

Ayon sa 4:00 a.m. bulletin ng PAGASA, si Fung-Wong ay huling namataan 1,715 kilometro silangan ng Northeastern Mindanao, taglay ang maximum sustained winds na 65 km/h at gustiness na umaabot sa 80 km/h, habang kumikilos pa-northwest sa bilis na 20 km/h.

Kapag pumasok ito sa PAR, bibigyan ito ng lokal na pangalan na “Uwan.” Inaasahang papasok ito late Friday evening o early Saturday morning, at maaaring lumakas pa bilang isang typhoon sa Biyernes at super typhoon pagsapit ng Sabado, ayon sa forecast ng PAGASA.

Bagama’t may mataas na antas ng uncertainty sa track at intensity forecast sa ika-4 at ika-5 araw, tumataas ang posibilidad ng landfall sa Northern o Central Luzon sa Lunes, Nobyembre 10. Maaaring magtaas ng Tropical Cyclone Wind Signals sa silangang bahagi ng Luzon at ilang bahagi ng Samar provinces sa Biyernes ng gabi o Sabado ng umaga, ngunit inaasahang mararamdaman ang epekto ng bagyo sa Linggo.

Patuloy ang monitoring ng PAGASA sa galaw ng bagyo at inaasahang maglalabas ng mga update sa mga susunod na araw.

Larawan mula DOST-PAGASA