MANILA — Inatasan ng Sandiganbayan ang 90-araw na preventive suspension kay San Simon, Pampanga Mayor Abundio “Jun” Punsalan Jr., kaugnay ng kasong graft at extortion na isinampa laban sa kanya matapos umano’y tangkaing kikilan ng P80 milyon ang isang kompanya ng bakal.

Sa resolusyong inilabas ng Seventh Division ng Sandiganbayan noong Nobyembre 4, sinabi ng korte na ang suspensiyon ay alinsunod sa Section 13 ng Anti-Graft and Corrupt Practices Act (RA 3019), na nagsasaad ng mandatory suspension sa mga opisyal ng gobyerno na may kinakaharap na kasong kriminal sa ilalim ng batas.

Ayon sa korte, “In the case at the bar, the accused contended that the transaction or criminal act involved private funds of a private entity and has nothing to do with government funds and property. However, the facts remained that one of the charges levelled against Punsalan is violation of Section 3.b of the Anti-Graft and Corrupt Practices Act. This (suspension) fell within the ambit of Section 13 of the said law.”

Ang kaso ay nag-ugat sa isang entrapment operation noong Setyembre sa isang restaurant sa Clark Freeport Zone, kung saan si Punsalan ay umano’y nahuling tumatanggap ng bag na naglalaman ng P30 milyon bilang bahagi ng hinihinalang kabuuang P80 milyong suhulan mula sa isang steel company.

Sa 7-pahinang resolusyon, inutusan ng korte si Punsalan na “cease and desist from further performing and/or exercising the functions, duties and privileges of his position.”

Bagama’t iginiit ng kampo ni Punsalan na ang transaksyon ay hindi sangkot ang pondo ng gobyerno, binigyang-diin ng Sandiganbayan na ang kasong isinampa ay saklaw pa rin ng batas laban sa katiwalian.

Ang suspensiyon ay pansamantala habang dinidinig ang kaso, upang maiwasan ang posibleng panggugulo sa ebidensya o impluwensiya sa mga testigo.