NOBYEMBRE 9, 2025 — Walang basehan at kathang-isip lamang ang sinasabing arrest warrant laban kay Senador Ronald “Bato” dela Rosa, ayon kay Nicholas Kaufman, abogado ng International Criminal Court (ICC) para kay dating Pangulong Rodrigo Duterte.

Sa gitna ng pahayag ni Ombudsman Jesus Crispin Remulla na may utos na umano ang ICC para arestuhin si dela Rosa kaugnay ng imbestigasyon sa madugong kampanya kontra droga ng administrasyong Duterte, mariing itinanggi ito ni Kaufman.

“There is nothing to suggest that the supposed arrest warrant for Senator Dela Rosa is anything other than a figment of Ombudsman Remulla’s fertile imagination,” ani Kaufman. 

(Walang anumang palatandaan na ang sinasabing arrest warrant laban kay Senador Dela Rosa ay iba pa sa bunga ng masaganang imahinasyon ni Ombudsman Remulla.)

Dagdag pa niya, hindi lohikal para sa ICC na maglabas ng panibagong warrant habang nakabinbin pa ang usapin ng hurisdiksyon nito sa Pilipinas. 

“It goes against all common sense and prosecutorial logic for the ICC to issue further warrants in the context of the Philippines investigation until the issue of its ability to exercise jurisdiction over the so-called war on drugs has been finally resolved on appeal,” paliwanag ni Kaufman. 

(Kontra ito sa lohika at proseso ng prosekusyon na maglabas ng karagdagang warrant habang hindi pa tapos ang usapin ng hurisdiksyon ng ICC sa tinatawag na giyera kontra droga.)

Kinumpirma rin ng tagapagsalita ng ICC na si Fadi El Abdallah na wala pang bagong warrant na inilalabas ang korte maliban sa kaso ni Duterte. 

“Official ICC updates can only be confirmed through its official channels,” aniya. 

(Maaaring kumpirmahin ang opisyal na update ng ICC sa pamamagitan lamang ng mga opisyal nitong channel.)

Sa panig ng gobyerno, sinabi ng Malacañang at Department of Foreign Affairs na wala silang natatanggap na kumpirmasyon mula sa ICC tungkol sa sinasabing warrant kay dela Rosa.

Si dela Rosa, dating hepe ng PNP, ay paulit-ulit nang itinanggi ang anumang paglabag sa batas at iginiit na legal ang mga operasyon sa ilalim ng kampanya kontra droga.

(Larawan: Philippine News Agency)