MANILA, Philippines — Habang maraming lugar sa Pilipinas ang binaha dahil sa hagupit ng Typhoon Uwan at Tino, nakahimok ng pansin ang Bonifacio Global City (BGC) sa Taguig dahil sa kakaibang paraan nito upang maiwasan ang pagbaha.

Sa ilalim ng Burgos Circle, matatagpuan ang malaking underground water detention tank na dinisenyo upang pansamantalang imbakan ng tubig-ulan tuwing malakas ang pag-ulan bago ito ipump palabas patungo sa Pasig River. Dahil dito, ligtas ang BGC mula sa pagbaha kahit sa matinding pag-ulan.

Ang nasabing pasilidad ay humigit-kumulang 12 metro ang lalim, katumbas ng apat na palapag ng gusali, at may kapasidad na 22,000 cubic meters ng tubig—o halos katumbas ng walong Olympic-sized swimming pools.

Ayon sa mga eksperto, ipinapakita ng ganitong uri ng imprastraktura ang kahalagahan ng maayos na urban planning at makabagong flood control design sa paglaban sa matitinding epekto ng klima at bagyo.

Ang BGC ay halimbawa kung paano maaaring protektahan ng teknolohiya at maingat na pagpaplano ang mga urban areas laban sa pagbaha, na inspirasyon para sa iba pang lungsod sa bansa. (Larawan: BGC / Facebook)