MANILA — Inanunsyo ng Department of Social Welfare and Development (DSWD) na nakapaghatid na ito ng ₱6.4 milyon na halaga ng paunang humanitarian assistance sa mga pamilyang naapektuhan ng Super Typhoon Uwan. 

Ayon kay DSWD Secretary Rex Gatchalian, ang tulong ay kinabibilangan ng family food packs (FFPs) at non-food items (NFIs) na naipuwesto na sa mga regional hubs, spokes, at last-mile warehouses bago pa man tumama ang bagyo sa bansa.

Sa isang panayam, sinabi ni Gatchalian, “Kung tatanungin tayo kung may sapat na food packs para sa ating mga kababayan, mayroon at handang-handa ang DSWD na tumulong sa ating mga local government units (LGU) para marespondehan ang mga pangangailangan ng kanilang mga mamamayan.” 

Dagdag pa niya, halos dalawang milyong food packs ang naipuwesto sa buong bansa bilang bahagi ng pre-disaster preparedness ng ahensya.

Pinalawak din ng DSWD ang daily repacking operations mula 18,000 hanggang 25,000 food packs upang matugunan ang tumataas na pangangailangan sa mga evacuation centers. 

Nag-inspeksyon si Gatchalian sa Luzon Disaster Response Center sa Pampanga noong Nobyembre 9 upang tiyakin ang kahandaan ng mga relief goods para sa mga nasalanta.

Bukod sa food packs, nagsagawa rin ang DSWD-Bicol Region ng hot meal distribution sa mga evacuees sa Mercedes Evacuation Center sa Camarines Norte bilang bahagi ng agarang tugon sa mga naapektuhan ng bagyo. 

Tiniyak ng ahensya na walang pinapaborang lugar sa distribusyon ng tulong at lahat ng apektadong komunidad ay prayoridad sa relief operations.

Patuloy ang koordinasyon ng DSWD sa mga LGU upang mapabilis ang distribusyon ng tulong, lalo na sa mga lugar na lubhang tinamaan ng bagyo. Inaasahan pang tataas ang kabuuang halaga ng tulong habang nagpapatuloy ang relief operations sa buong bansa.

Larawan mula The Blaze - The Official Student Publication of NEUST