MANILA — Kinumpirma ni Senador Jinggoy Estrada na si dating Senate President at kasalukuyang Chief Presidential Legal Counsel Juan Ponce Enrile ay kasalukuyang naka-confine sa intensive care unit (ICU) ng isang hindi pinangalanang ospital dahil sa pneumonia.

“I have information that our colleague former Senate President Juan Ponce Enrile is currently in the ICU of an undisclosed hospital suffering from pneumonia. I heard from a very, very reliable source that he has slim chances of surviving,” pahayag ni Estrada sa isang sesyon ng Senado nitong Martes, Nobyembre 11.

Nag-alay ng panalangin ang mga senador para sa kalagayan ni Enrile, na sa edad na 101 ay nananatiling isa sa pinakamatagal na naglingkod sa gobyerno ng Pilipinas. Kilala si Enrile sa kanyang papel sa panahon ng Martial Law bilang kalihim ng depensa, sa EDSA Revolution noong 1986, at sa kanyang panunungkulan bilang Senate President mula 2008 hanggang 2013.

Sa kabila ng kanyang edad, aktibo pa rin si Enrile sa serbisyo publiko bilang Chief Presidential Legal Counsel ni Pangulong Ferdinand Marcos Jr. Hanggang sa kasalukuyan, wala pang opisyal na pahayag ang kanyang pamilya ukol sa kanyang kalagayan.

Si Enrile ay isa sa mga pinakakilalang personalidad sa kasaysayan ng politika sa Pilipinas, na may mahigit pitong dekada ng karanasan sa pamahalaan. Patuloy ang pag-aalala ng publiko at mga kaalyado sa Senado habang hinihintay ang karagdagang impormasyon mula sa kanyang pamilya.