CEBU CITY, Philippines — Patuloy ang Cebu Provincial Government sa repacking ng relief goods para sa mga biktima ng Typhoon Tino sa Capitol Warehouse, kung saan nakilahok ang mga kawani ng Capitol at mga boluntaryo mula sa Philippine National Police (PNP).

Ayon sa ulat, kabilang sa mga repacked goods ang mahigit 500 sets ng kitchenware na agad na ipinamahagi sa Barangay Cabadiangan sa bayan ng Compostela, isa sa mga lugar na pinakamatinding naapektuhan ng bagyo. Layunin ng repacking operations na masiguro ang maayos at mabilis na pamamahagi ng tulong sa mga nasalanta.

Ipinahayag ni Cebu Governor Pamela Baricuatro ang kanyang taos-pusong pasasalamat sa lahat ng PNP personnel at boluntaryo na tumugon sa panawagan ng gobyerno para sa pakikipagtulungan at pagkakaisa sa pagtulong sa mga Cebuanos. 

Nanawagan din ang gobyerno sa publiko na patuloy na makiisa sa relief efforts upang mas marami pang nasalanta ang mabigyan ng agarang tulong. Ang pagkakaisa ng pamahalaan, PNP, at mga mamamayan ay itinuturing na susi sa mas epektibong disaster response sa Cebu. (Larawan: Cebu Province / Facebook)