NOBYEMBRE 12, 2025 — Muling nasilayan ang pambansang ibon ng Pilipinas sa Mt. Sinaka, Cotabato matapos ang dalawang taong pagkawala sa lugar, ayon sa Department of Environment and Natural Resources (DENR) Soccsksargen. Sa isinagawang monitoring mula Nobyembre 4 hanggang 7, 2025, namataan ang Philippine eagle (Pithecophaga jefferyi) na lumilipad sa gilid ng kagubatan.

“A Philippine eagle (Pithecophaga jefferyi) was sighted again at Mt. Sinaka during the second semestral monitoring of the species held from November 4 to 7, 2025. The majestic raptor was observed soaring along the forest edges, marking its return to the area after being unrecorded for two years,” pahayag ng DENR sa social media. 

(Muling namataan ang isang Philippine eagle (Pithecophaga jefferyi) sa Mt. Sinaka sa ikalawang semestral monitoring ng species na isinagawa mula Nobyembre 4 hanggang 7, 2025. Ang maringal na ibon ay nakita na lumilipad sa gilid ng kagubatan, hudyat ng pagbabalik nito matapos ang dalawang taong pagkawala.)

Itinuturing na critically endangered ng International Union for Conservation of Nature ang agila, na tinatayang nasa 400 pares na lamang sa kalikasan. Kilala rin itong pinakamataas na mandaragit sa bansa at matatagpuan lamang sa Luzon, Leyte, Samar, at Mindanao.

Ayon sa mga eksperto, ang pagkawala ng agila sa Mt. Sinaka ay maaaring dulot ng pagbabago sa supply ng pagkain, iwas sa kompetisyon, at likas na paglayo ng mga kabataang agila.

Bagaman may sukat lamang na 1,500 hanggang 2,000 ektarya, kinikilala ang Mt. Sinaka bilang pinakamaliit na natural sanctuary ng agila. Dito matatagpuan ang pugad, pagkain, at silungan ng mga nanganganib na hayop.

“The declaration of Mt. Sinaka as a critical habitat has opened opportunities for funding and resource allocation to support continued research, conservation programs, and sustainable management practices vital for the survival of the Philippine eagle and other endangered species in the area,” dagdag ng DENR. 

(Ang deklarasyon sa Mt. Sinaka bilang critical habitat ay nagbukas ng oportunidad para sa pondo at mga programa sa konserbasyon at pamamahala na mahalaga sa kaligtasan ng Philippine eagle at iba pang nanganganib na species sa lugar.)

(Larawan: Philippine News Agency)