DINGLE, ILOILO — Isang 80-anyos na babae ang nasawi matapos tamaan ng tumalsik na rim lock ng gulong mula sa isang delivery truck habang nakaupo sa isang waiting shed sa Barangay Tabugon, Dingle, Iloilo.

Kinilala ang biktima sa ulat ng Aksyon Radyo Iloilo bilang si alyas Luz, residente ng nasabing barangay. Ayon sa imbestigasyon ng Dingle Municipal Police Station, naganap ang insidente bandang alas-9:20 ng umaga habang ang biktima ay nakaupo sa gilid ng national highway. Bigla na lamang tumalsik ang lock ng rim ng gulong ng truck na dumadaan at tumama sa katawan ng matanda.

Ang driver ng truck ay nakilalang si alyas Rey, 36 taong gulang, residente ng Ubian, Janiuay. Galing umano siya ng Passi City at patungo sana sa Pototan nang mangyari ang insidente. Ayon sa pulisya, “nakaupo sa waiting shed sa gilid ng national highway ang biktima nang tamaan ito ng tumalsik na lock ng rim ng truck.”

Agad na isinugod si Luz sa Pototan District Hospital ngunit idineklara siyang dead on arrival dahil sa matinding pinsala sa dibdib, braso, at ulo. Kinumpirma ng mga awtoridad na ang lock ng rim ang tumama sa biktima, na naging sanhi ng kanyang agarang pagkamatay.

Nasa kustodiya na ng Dingle PNP ang driver ng truck. Gayunman, ayon sa pulisya, nagkasundo na umano ang anak ng biktima at ang suspek na hindi na magsasampa ng kaso. Nagpaabot din ng pasalig ang may-ari ng truck na sasagutin ang lahat ng gastusin sa pagpapalibing ng biktima.

Patuloy ang imbestigasyon ng mga awtoridad upang matukoy kung may pananagutan pa ang driver o ang kumpanya ng truck sa insidente. Nanawagan ang lokal na pamahalaan sa mga motorista na tiyaking maayos ang kondisyon ng kanilang mga sasakyan upang maiwasan ang ganitong trahedya.