ILOILO CITY — Ilang paaralan sa Iloilo City at Iloilo province ang napilitang magsuspinde ng klase at magsagawa ng agarang evacuation nitong Nobyembre 17, 2025, matapos makatanggap ng sunod-sunod na bomb threat na bahagi umano ng lumalalang pattern ng pananakot sa mga institusyong pang-edukasyon simula pa noong Oktubre.

Isa sa mga unang tinamaan ay ang Iloilo Science and Technology University (ISAT-U) La Paz Campus, kung saan daan-daang estudyante ang naglabasan sa mga gusali at nagtipon sa mga kalapit na kalsada habang nagsasagawa ng clearing operations ang mga pulis at bomb squad. Ayon sa ulat, nagdulot ito ng matinding trapiko sa Burgos Street habang sinisiguro ng mga awtoridad ang kaligtasan ng lugar.

Bukod sa ISAT-U, kabilang din sa mga paaralang nakatanggap ng banta ay ang Iloilo National High School (INHS), West Visayas State University, University of San Agustin–Basic Education Department sa Jaro, at ilang paaralan sa bayan ng Janiuay. 

Sa isang insidente noong Nobyembre 13, isang estudyante ng Electronics Engineering ang napilitang iwan ang kanyang gamit sa gitna ng pagsusulit matapos pumasok ang isang ROTC cadet upang ipaalam ang bomb threat.

Ayon sa Police Regional Office 6 (PRO-6), nagsimula na ang masusing imbestigasyon upang matukoy ang mga nasa likod ng serye ng bomb threats. Sinabi ni PRO-6 director BGen. 

Josefino Ligan, "The safety of our students and school personnel is our top priority. We strongly condemn any act meant to sow fear and disrupt the peace in our communities." 

Binalaan din niya ang publiko na ang pagpapakalat ng pekeng bomb threat ay may kaukulang parusa sa ilalim ng Presidential Decree 1727, kabilang ang limang taong pagkakakulong at multang ₱40,000.

Patuloy ang panawagan ng mga awtoridad sa publiko na manatiling kalmado, huwag magpakalat ng hindi beripikadong impormasyon, at agad i-report ang anumang kahina-hinalang aktibidad sa mga kinauukulan.