QUEZON CITY — Isang babaeng kalahok sa kilos-protesta kontra katiwalian ang sugatan matapos mabagsakan ng drone sa ulo sa ikalawang araw ng rally sa People Power Monument sa EDSA, nitong Lunes ng gabi, Nobyembre 17.

Ayon sa ulat, ang insidente ay naganap habang libu-libong miyembro ng Iglesia Ni Cristo (INC) ang nagtitipon sa lugar bilang bahagi ng “Rally for Transparency and a Better Democracy.” Agad na tumugon ang mga awtoridad upang bigyan ng paunang lunas ang biktima, na nagtamo ng laceration sa ulo. Dinala siya sa ospital para sa karagdagang gamutan.

Kinumpirma ng Quezon City Police District (QCPD) na iniimbestigahan pa kung kanino galing ang drone. Ayon kay Police Major Jennifer Ganaban, tagapagsalita ng QCPD, “We are still verifying reports if the drone came from the organizers as alleged by some witnesses.” 

Dagdag pa niya, hindi pa rin inilalabas ang pagkakakilanlan ng biktima, alinsunod sa kahilingan ng mga kaibigan nito na nagsabing pauwi na sana sila sa Pampanga nang mangyari ang insidente.

Samantala, kinumpiska na ng Quezon City Department of Public Order and Safety (DPOS) ang drone matapos ang insidente. Ayon sa DPOS, patuloy ang kanilang koordinasyon sa mga organizer ng rally upang matiyak ang kaligtasan ng mga dumadalo sa pagtitipon.

Ang naturang rally ay bahagi ng tatlong araw na kilos-protesta ng INC na nagsimula noong Nobyembre 16. Ayon sa tala ng Manila Police District, tinatayang nasa 650,000 katao ang dumalo sa unang dalawang araw ng pagtitipon. Layunin ng rally na ipanawagan ang transparency, accountability, at katarungan sa gitna ng mga alegasyon ng P100 bilyong flood control scam.

Bagama’t nananatiling mapayapa ang kabuuan ng pagtitipon, nanawagan ang mga awtoridad sa publiko at sa mga organizer na tiyaking ligtas ang paggamit ng mga teknolohiyang tulad ng drone, lalo na sa mga pampublikong pagtitipon.

Patuloy ang imbestigasyon ng QCPD at DPOS sa insidente upang matukoy ang responsibilidad at maiwasan ang kahalintulad na pangyayari sa hinaharap.