CALASIAO, Pangasinan — Mahigit 100 residente ng bayan ng Calasiao ang nakatanggap ng tulong mula sa Assistance to Individuals in Crisis Situations (AICS) program ng Department of Social Welfare and Development (DSWD) sa isinagawang distribusyon nitong Martes, Nobyembre 18.

Pinangunahan ng lokal na pamahalaan ng Calasiao ang aktibidad, katuwang ang DSWD, upang mabigyan ng agarang suporta ang mga indibidwal at pamilyang kasalukuyang nahaharap sa matinding pangangailangan, biglaang gastusin, o krisis tulad ng pagkakasakit, pagkawala ng trabaho, aksidente, at iba pang emergency situations.

Ayon sa LGU, kabilang sa mga napabilang sa benepisyaryo ay mga senior citizen, solo parents, indigent families, at mga residenteng humarap sa biglaang pangangailangang pinansyal sa nagdaang mga linggo. Ang tulong ay maaaring nasa anyo ng financial assistance, medical support, o transportation aid, depende sa pangangailangan ng bawat recipient.

Ipinahayag din ng lokal na pamahalaan na patuloy nitong sisikapin na makipag-ugnayan sa DSWD upang mas maraming residente pa ng Calasiao ang mabigyan ng ayuda, lalo na ngayong papalapit ang holiday season kung saan tumataas ang gastusin ng maraming pamilya.

Nagpasalamat naman ang mga benepisyaryo sa natanggap na tulong, na anila'y malaking ginhawa sa kanilang sitwasyon at dagdag pag-asa upang maipagpatuloy ang pagbangon mula sa kani-kanilang pinagdadaanan. (Larawan: Calasiao Information Office / Facebook)