MANILA — Kinumpirma ni Ombudsman Jesus Crispin Remulla na naghahanda na ang kanyang tanggapan na magsampa ng kaso at maglabas ng arrest warrants laban sa mahigit 30 indibidwal na sangkot umano sa multibillion-peso flood control corruption scandal.

Sa sunod-sunod na panayam, sinabi ni Remulla, “There are many of them. That’s more than 30 already, maybe even 40, including officials of the companies,” tinutukoy ang mga kontratista at kawani ng gobyerno na umano’y bahagi ng kickback scheme. Dagdag pa niya, inaasahang mailalabas ang mga warrant “by December 15 or 16,” bago ang Christmas break.

Kabilang sa mga inaasahang makakasuhan ay tatlong kasalukuyang senador — sina Francis Escudero, Joel Villanueva, at Jinggoy Estrada — at dalawang dating senador — sina Bong Revilla Jr. at Nancy Binay. Kasama rin sa listahan si dating Ako Bicol Rep. Zaldy Co, dating special envoy to China Maynard Ngu, at ang tinaguriang “BGC Boys” — sina Henry Alcantara, Brice Hernandez, at Jaypee Mendoza.

Ang iskandalo ay nakasentro sa mga ghost flood control projects at overpriced contracts na umano’y isinulong ng isang network ng mga mambabatas, opisyal ng Department of Public Works and Highways (DPWH), at mga pribadong kontratista.

Binigyang-diin ni Remulla na ang imbestigasyon ay nakabatay sa mga sworn affidavits, kabilang na ang mula kay dating DPWH Undersecretary Roberto Bernardo at iba pang whistleblowers. “All those mentioned in the Bernardo affidavit are being investigated,” aniya sa panayam.

Bukod sa mga kasong graft at malversation, sinabi rin ng Office of the Ombudsman na tinitingnan nila ang mga kaso ng conflict of interest. Nilinaw ni Remulla na pinapabilis ang proseso alinsunod sa direktiba ni Pangulong Ferdinand Marcos Jr. para sa mabilis at walang kompromisong paglilinis sa hanay ng pamahalaan.

Larawan mula LinkedIn