NOBYEMBRE 18, 2025 — Nag-anunsyo ang pamahalaang lungsod ng Iloilo ng P100,000 pabuya para sa sinumang makapagbibigay ng tiyak na impormasyon hinggil sa nasa likod ng serye ng bomb threat na nagdulot ng pangamba sa mga paaralan at komunidad.

Ayon sa ulat, nagsimula ang insidente noong gabi ng Nobyembre 16 nang makatanggap ng banta ang isang paaralan. Kinabukasan, Nobyembre 17, umabot sa siyam na pampubliko at pribadong paaralan sa lungsod at lalawigan ang naapektuhan ng magkakasunod na bomb threat.

Mariing kinondena ni Iloilo City Mayor Raisa Treñas ang pangyayari at iginiit na hindi lamang ito usapin ng edukasyon kundi ng kaligtasan ng buong siyudad.

"We are serious about this. Indi lang ini isyu sang pagtuon sang kabataan, kundi isyu man sang seguridad sang bilog nga siyudad. Gina-assure ko ang publiko nga nagapadayon ang close coordination naton upod sa ICPO [Iloilo City Police Office], RACU [Regional Anti-Cybercrime Unit], kag NBI [National Bureau of Investigation] para maka-identify ang responsable sini," ani Treñas.

(Seryoso kami rito. Hindi lang ito usapin ng pag-aaral ng kabataan, kundi usapin din ng seguridad ng buong siyudad. Tinitiyak ko sa publiko na nagpapatuloy ang malapit na koordinasyon natin kasama ang ICPO, RACU, at NBI para matukoy ang responsable dito.)

Samantala, nagpaalala ang Police Regional Office (PRO) 6 na ang pagbibiro o pagpapakalat ng maling bomb threat ay hindi biro at may mabigat na kaparusahan sa ilalim ng batas.

"Bomb jokes may sound harmless to some, but they can trigger real panic, disrupt operations, and put innocent lives at risk. Under the law, making false bomb threats is a serious criminal offense with heavy penalties, including imprisonment and fines. Always remember that safety is everyone’s responsibility. Let’s choose our words wisely and help create a secure environment for all. Stay alert, stay responsible, and never treat bomb jokes as something to laugh about," saad ng pahayag.

(Maaaring hindi mukhang masama ang bomb jokes para sa iba, pero maaari itong magdulot ng tunay na takot, makaistorbo sa operasyon, at malagay sa panganib ang inosenteng buhay. Sa ilalim ng batas, ang paggawa ng maling bomb threat ay isang mabigat na krimen na may mabigat na parusa, kabilang ang pagkakakulong at multa. Laging tandaan na ang kaligtasan ay responsibilidad ng lahat. Piliin natin ang tamang salita at tumulong sa paglikha ng ligtas na kapaligiran. Maging alerto, maging responsable, at huwag gawing biro ang bomb jokes.)

Batay sa Presidential Decree 1727, ang sinumang mapatunayang gumawa ng bomb threat o bomb joke ay maaaring makulong ng hanggang limang taon, pagmultahin ng hanggang P40,000, o parehong parusa ang ipataw.

Sa gitna ng takot na naidulot ng mga banta, nanawagan ang lokal na pamahalaan sa publiko na makiisa sa imbestigasyon at magbigay ng impormasyon upang tuluyang matigil ang ganitong uri ng pananakot.

(Larawan: Philippine News Agency)