NEGROS OCCIDENTAL — Nagpakita ng pambihirang bayanihan ang mga residente ng Barangay Don Jorge Araneta sa Bago City, Negros Occidental matapos maisagawa ang isang DIY flood control project gamit lamang ang kawayan, bilang proteksyon laban sa patuloy na banta ng pagbaha sa kanilang komunidad.

Ayon sa barangay officials, mahigit 400 kabahayan mula sa apat na purok ang nagtulong-tulong sa paggawa ng improvised flood barrier, matapos masira ng bagyong “Tino” ang dike ng Suba Maragandang. Dahil wala pang permanenteng solusyon mula sa pamahalaan, napagpasyahan ng mga residente na kumilos at gumawa ng pansamantalang paraan upang maiwasan ang pag-apaw ng tubig na maaaring magdulot ng pinsala sa kanilang mga tahanan at kabuhayan.

Ginamit nila ang kawayan bilang pangunahing materyales dahil madali itong makuha, matibay, at kayang pagtagpi-tagpiin upang magsilbing harang sa rumaragasang tubig mula sa ilog. Bukod dito, nag-ambagan din ang mga residente ng lakas, oras, at kagamitan para sa pagpapatayo ng naturang flood control measure.

Ayon sa mga residente, hindi nila intensyon na palitan ang responsibilidad ng mga awtoridad, ngunit nais lamang nilang maprotektahan ang kanilang pamayanan habang naghihintay ng mas matibay at pormal na solusyon mula sa gobyerno.


Umaasa ang mga taga-Don Jorge Araneta na magsilbing paalala ang kanilang inisyatiba na kailangang agarang tugunan ang problemang pang-infrastruktura sa kanilang lugar. Habang wala pa, ipagpapatuloy nila ang tradisyunal na lakas ng bayanihan para sa kaligtasan ng kanilang komunidad. (Larawan: Ma Cecilia F. Solis / Facebook)